Ena Okotova 1946, ratou gole i Peru na imatai ni daukaulotu. Ratou raica na tacida qori ni vinakati vakalevu ena vanua qo na cakacaka vakavunau. Era tiko e Peru e vitu na milioni na lewenivanua, qai rauta ni 1.3 na milioni na kilomita vakarivirivi na levu ni vanua. Ena 75 na yabaki sa oti, era gugumatua na daukaulotu kei ira na dautukutuku ena cakacaka vakaitalatala ena veikoro ena ulunivanua, kei na siti ena veibaravi e Peru. Levu tale ga era mai kila kina na dina.

Ena veiyabaki ni bera nira lesi i kea na daukaulotu, era dau gole i Lima na koroturaga kei Peru, na tacida mai Sauca Amerika. Era solia tale ga na ivola vakaivolatabu vei ira na tataleitaki. Eso vei ira qori era mai qaravi Jiova. Ena 1945, rau gole i Lima e rua na daukaulotu rau veiqaravi tiko mai Chile, me rau lai papitaisotaki ratou na imatai ni tolu na tacida ena vanua ya.

Tekivu mai na Okotova 1946, era lesi eso na daukaulotu era vuli oti mai Kiliati mera lai tuvanaka na cakacaka i Peru. Era cakava tale ga na imatai ni soqoni kei ira na tataleitaki ena yasana o Rimac e Lima. Ni tubu na kedra iwiliwili na dautukutuku kei ira na daukaulotu, e tete tale ga na cakacaka vakavunau ena taudaku kei Lima. E se vakilai tiko ga na tubu qori me yacova mai nikua.

O Sister Nellena Pool, e dua vei ira na imatai ni daukaulotu a gole ena 1946. E tabaki na kena italanoa ena Vale ni Vakatawa, 1 Maji, 1957. E kaya me baleta na tubu e vakilai e Peru: “I liu e vaka tu na vanua dravuisiga o Peru ni vica ga na dautukutuku era tiko kina. Ia toso na gauna levu era sa mai kila na ka dina, e vaka ga ni vuki na vanua dravuisiga me veiloga rosi.’”

O Sister Irene Mannings, a vuli oti mai na ika54 ni kalasi e Kiliati, e se veiqaravi tiko ga qo e Peru. E kaya: “Ni keirau yaco mai, e tubu na iwiliwili ni dautukutuku mai na 7,000 ina sivia na 130,000. E ka dokai vei au meu vakaitavi tu vakalailai ena tubu qo. E rawa ga qori ena veitokoni i Jiova.”

Era vakavinavinakataka vakalevu na 133,170 na dautukutuku era veiqaravi tiko qo e Peru, na cakacaka vakavunau a caka ena 75 na yabaki sa oti. Na nodra cakacaka vakavunau na tacida e Peru, e dina kina na ka e yalataka o Jiova ena Aisea 60:22: “O koya e lailai sara ena yaco me le duanaudolu, kei koya e lailai me matanitu qaqa.”