Ena ika26 ni June, 2018 era gole eso na mata ni ebesi ni Tailadi ina valenivolavola ni tabana ni iVakadinadina i Jiova e Lima, na koroturaga kei Peru. Era lai vakavinavinakataki ira na tacida ena nodra vukei ira eso na lewenivanua e Tailadi era vesu tu ena dua na valeniveivesu e Peru.

Ena 2007 era dau sikova na valeniveivesu na iVakadinadina i Jiova e Peru mera veivakavulici ena iVolatabu. Ia ena 2013, era sa sikova tale ga na valeniveivesu era tiko kina na kaivesu mai Tailadi. E qoroya sara ga na vakailesilesi ni mata ni ebesi nodra dauveikauaitaki na tacida, e mani tuvanaka me sikovi na noda valenivolavola ni tabana.

Ratou mata ni ebesi o Mr. Angkura Kulvanij e dua na vakailesilesi, o Mr. Pathompong Singthong na vunivola, kei Ms. Pradthana Pongudom nona ivukevuke na vunivola. Ni ratou sarasara tiko ratou veitomani tale tu ga na Komiti ni Tabana. E vakaraitaki vei ratou na cakacaka ni vakadewa, qo na kena vakadewataki na noda ivola ina ciwa na vosa.

E vola sara ga na ebesi e dua na ivola ni “vakavinavinaka kei na veidokai,” ena nodra gumatua na tacida nira vukei ira na “vakaloloma kei na dravudravua e Peru, se mani matatamata cava era lewena.” E vakavinavinakataki tale ga na “nodra gumatua kei na cakacaka na lewe ni iSoqosoqo ni iVakadinadina i Jiova ena valenivolavola ni tabana e Peru nira vukei ira na lewenivanua e Tailadi ena ituvaki dredre era tu kina e valeniveivesu, me vinaka tale ga nodra bula.”

Na veika e yaco qo vei ira na tacida e Peru e vakaraitaka na yaga ni kena tukuni tiko na itukutuku ena iVolatabu vei ira na veimataqali tamata.—1 Korinica 9:22.