Ena ika7 ni Janueri 2020, e kurei Puerto Rico e dua na uneune e 6.4 na kena kaukaua, qai yaco veitaravi tale e vica vata na drau na uneune. Ena ika11 ni Janueri, e kurea tale na vanua qori na uneune e 5.9 na kena kaukaua.

Levu na vanua e vakacacani e boko nodra livaliva, levu tale ga vei ira era sega ni tiko e nodra vale. E vakadeitaka na valenivolavola ni tabana e Merika, ni sega ni dua na tacida e mavoa se mate. Ia era sa tokitaki e le 248 na tacida. Kuria ya, e vakacacani e 8 nodratou vale na tacida, le 70 tale na vale e vakacacani vakalailai. E vakacacani tale ga e 10 na Vale ni Soqoni. Era sa veivuke tiko vakayago, ra veivakatawani tale ga na Komiti ni Vakacoko kei ira na ivakatawa ni tabacakacaka.

Era sotava na tacida na veika dredre, ia era yalodina tiko ga ni qaravi Jiova. E kaya o Brother Robert e veiqaravi tiko ena Tabana ni iTukutuku ena valenivolavola ni tabana e Merika: “Sega ni dau yaco vakalevu e Puerto Rico na leqa tubukoso va qo. Na uneune e vakavuna mera lomaocaoca e levu na tacida. Ia uqeti keimami vakalevu nodra sega vakadua ni yalolailai na tacida. Ke rawa, era na tiko ena soqoni kei na cakacaka vakavunau ke sega mada ga na wai se livaliva. Dua na ka nodra cakacaka vakaukaua na qase ni vavakoso ena nodra vukei, ra qai vakayaloqaqataki na tacida era vakaleqai.”

Era vosota na tacida na leqa tubukoso, ia eda uqeti ena nodra ivakaraitaki nira vakavinavinakataka tiko ga na ka vakayalo. Meda nanumi ira ena masu ni na solia tiko ga vei ira o Jiova na vakacegu ni vakasama.—Same 119:165.