Ena ika19 ni Epereli 2020, a vakayacori e dua na soqo lavotaki e Bucharest, Romania. E sevutaki kina na iVolatabu vakavoutaki na New World Translation of the Holy Scriptures ena vosa vakaRomania. E lesi me qarava na itavi qori o Brother Jon Brenca, e lewe ni Komiti ni Tabana e Romania. Era sarava ena Internet na porokaramu qori na ivavakoso kece era vosa vakaRomania e Moldova kei Romania. E vakadewataki tale ga ena vosa vakaHungary, vakaRoma (Romania) kei na vosa vaGalu ni Romania. Era sarava kece na porokaramu qori e sivia na 69,000.

E sivia e tolu na yabaki na nodratou vakadewataka tiko na iVolatabu qori e rua na timi ni vakadewa. E matata, qai rawarawa na vosa e vakayagataki ena iVolatabu vakavoutaki qo ni vakadewataka donu na vakasama mai na iVolatabu taumada. E kaya e dua na daunivakadewa: “Ni vakayagataki na vosa ni gauna qo ena vakadewa vakavoutaki ni New World Translation e rawarawa na kena wiliki . . .  e uqeta sara ga na lomada na itukutuku yaga era tu kina.”

E kaya e dua tale na lewe ni timi ni vakadewa: “Ni matata vinaka na vosa e vakayagataki ena iVolatabu qo, eda na rawa kece ni vulica, se da qase se gone. Qori ena uqeti ira na yalomalumalumu mera mai kilai Jiova. E tu kina na vosa bula qai kilai rawarawa.”

Sa vakadewataki taucoko se vakatikina na New World Translation of the Holy Scriptures ena 186 na vosa, okati kina e 31 era vakavoutaki mai na itabataba ni iVolatabu vakavalagi ni 2013. Ena yaga dina vakalevu na vakadewa vakavoutaki qo vei ira na sivia na 65,000 na iVakadinadina i Jiova era vosa vakaRomania.

Na soqo lavotaki qo e ivakadinadina ni o Jiova e vakalougatataki ira na lomani koya, ra qai via qaravi koya ena duavata.—Vosa Vakaibalebale 10:22.