Ena June 2020, a tau vakalevu na uca ena taoni o Rodna ena yasana o Transylvania, e Romania. E yaco kina na waluvu. E vakacacani na nodratou vale e ono na tacida. Ena ika27 ni June 2020, e cakacaka vata na ivakatawa ni tabacakacaka e Rodna kei ratou na qase ni ivavakoso ekea ena nodra tuvanaki e 25 na mataveitacini ena tolu na ivavakoso mera vakaitavi ena cakacaka ni vakacoko. a E raica qori na mea ni siti o Rodna, e qai lai vakacaucautaki ira na mataveitacini ena tabana ni itukutuku ekea.

E toka volekata na vanua o Rodna e levu na veiuciwai. Dua na ka na levu ni soso ena gauna e yaco kina na waluvu, e lai dredre kina na veitosoyaki ena taoni. E dua na vanua ya e levu sara ga kina na soso kei na vakacaca, eratou sega ni gole rawa kina na mea kei na nona vakailesilesi. E tiko tale ga ena vanua qori e dua na tacida yalewa. Ia nira yaco yani na tacida, era samaka sara na vanua qori, me rawa ni yaco yani ena nona vale na tacida yalewa. Na ka era cakava qori na tacida, e lai vukea sara ga na nodra cakacaka na vakailesilesi ni taoni.

Oti qori, e qai vakacaucautaki ira na tacida na mea ena nona lai vakatarogi ena dua na siteseni ni tivi. E kaya: “Au via tukuna ni a yaco e dua na ka vakatubuqoroqoro e tarai au sara ga. . . . Ena imatai ni siga keitou cakacaka kina, keitou vakayagataka e dua na lori levu kei na dua na katavila. Ia se vo ga na cakacaka ena levu ni vakacaca. Ena siga e tarava, era mai vukei keitou e sivia ni 30 na bolecakacaka, qori era iVakadinadina i Jiova. E mai oti kina na cakacaka ena kena yakavi.” E qai tinia: “Na nodra mai veivuke gona na bolecakacaka qo, e mai vakasavasavataki kina na vanua qori. Au via vakavinavinakataki ira ga!”

E vakavinavinakataki ira tale ga na tacida ena dua na website na mea. E kaya: “Me vakalougatataki kemuni mada ga o Jiova, moni bula balavu tale ga, qai levu na ka oni rawata!”

Na ka e yaco qori mai Romania e dua tale na ivakaraitaki ni vakalagilagi na Tamada vakalomalagi o Jiova ena noda itovo vinaka.—1 Pita 2:12.