Ena ika26 ni Okosita 2023, e vakatabui e dua na Vale ni Soqoni Lelevu e Turda kei na tolu na tabavale ena valenivolavola ni tabana e Bucharest e Romania. E solia na kena ivunau o Brother Gage Fleegle, e lewe ni iLawalawa Dauvakatulewa. E vosa vei ira na le 1,702 era tiko ena Vale ni Soqoni Lelevu, ra qai sema tale ga mai ena Internet na le 14,101 mera rogoca na ivunau.

Era rogoca ena porokaramu na itukutuku makawa ni tarataravaki e Romania kei na sala e vakalougatataka kina o Jiova na noda cakacaka. Era vakatarogi tale ga na tacida era veiqaravi ena tabana ni tarataravaki. Ni mai cava na soqo, e kaya o Sister Iaela Drăghici, e taravaka ena Vale ni Soqoni Lelevu e Turda: “Au marau niu raica na kena vakatabui na veivale qo vei Jiova, me lagiti ga kina o koya.” E kaya tale ga o Brother Bruce Dyer, e veiqaravi ena tarataravaki e vanuatani, qai veivuke tale ga ena tarataravaki qo: “E dua dina na itavi dokai meda veivuke ena tarataravaki. E vakavinavinakataki ga kina o Jiova ena levu ni nona loloma!”

E tiko ena tabavale vou e dua na vale ni vuli me vakayagataki ena Koronivuli ni iTalatala ni Matanitu kei na nodra rumu na lewe ni vuvale e Peceli. E tiko tale ga kina na ofisi ni vakadewa, e dua na Vale ni Soqoni kei na nodra vanua ni wawa na vulagi e Peceli. E rawa nira tiko ena loma ni Vale ni Soqoni Lelevu vou na le 1,200, era rawa tale ga nira tiko e tuba na le 1,350. Era vakayagataka tiko na Vale ni Soqoni qori e rauta na le 15,000 mai na veiyasa i Romania.

E tomani na porokaramu ena siga tarava ena dua na vanua ni sara qito ena siti o Cluj-Napoca. E caka qori ena ika27 ni Okosita, era tiko kina na le 23,968. E vakadewataki ena vosa vakavalagi, vakaHungary, vosa vagalu ni Romania, vosa vaRomany (Romania), vakaRusia, vosa vagalu ni Rusia, kei na vosa vakaUkraine. Era rogoca tale ga na kena porokaramu na ivavakoso kece e Romania kei Ukraine. Era tiko kece kina na le 121,411.

Eda marau vata kei ira na tacida e Romania ni sa mai vakatabui na tabavale vou qo vei Jiova ni na tokona na sokalou savasava.—Aisea 2:3.