Ena tini na yabaki sa oti ena ika10 ni June 2010, a vakatulewataka na mataveilewai e dau valataka na nodra dodonu na lewenivanua e Urope (ECHR), ni beca o Rusia na nodra dodonu ni sokalou na iVakadinadina i Jiova. Qori na nona saga me tarova na nodra galala ni sokalou me vica vata na yabaki. E vakaroti Rusia na ECHR’s me sauma e dua na ilavo levu, me vakadonuya tale ga na kena vakalawataki na nodra isoqosoqo na iVakadinadina i Jiova e Moscow. A bokoci qori ena 2004.

Ni kacivaki oti ga na vakataulewa, e kaya o Brother Ivan Chaykovskiy e dua na iVakadinadina i Jiova e Moscow: “E laurai ena vakataulewa qo ni qaqa na ka e dodonu mai na veivakaduiduitaki vakalotu. Au nuitaka ni ka e yaco qo ena uqeti ira na vakailesilesi mera vakalesuya na neimami dodonu vakalewenivanua, me vakaotia tale ga na nodra dau vakacacani na iVakadinadina i Jiova e veiyasa i vuravura.”

Ia e qai sega ni yaco qori nira sega ni muria na vakailesilesi e Rusia na lewa e tauca na ECHR. Ia sa qai kaukaua ga na nodra vakacacani na iVakadinadina i Jiova e kea. E laurai qori ena lewa e tauca na Mataveilewai Levu e Rusia ena 2017 ni vakatabuya na noda sokalou, era vesu tale ga vakatawadodonu na tacida, era beitaki, rai qai bala e valeniveivesu.

Sa oti qo e tini na yabaki, se namaki tiko ga vei Rusia me muria na lewa e tauca na ECHR me baleta na taqomaki ni nodra dodonu na tacida. Tekivu mai na 2010, sa vakavica na nona sega ni vakadonuya na ECHR na nona beitaki ira tiko vakatawadodonu na tacida o Rusia ena vuku ni nodra sokalou.

E kaya ga na ECHR ni “cala sara tu ga vakalawa” na Tabana ni Lawa e Moscow kei na kena mataveilewai, ni sega ni vakadonuya me vakalawataka na iVakadinadina i Jiova e kea. E sega ni duavata na ECHR kei na ka era cakava na vakailesilesi e Moscow, e kaya nira “veitovaki, ra qai sega ni tauca vakadodonu na lewa.” Dua tale ga na ka era cala kina na vakailesilesi e Moscow nira beca na veidinadinati ni European Convention on Human Rights, a yalataka o Rusia ni na muria.

Sa tini na yabaki qo na kena kilai levu na nodra vakacacani na tacida e Rusia. E kaya o Rachel Denber, na ivukevuke ni dairekita me baleta na Dodonu ni Lewenivanua e Urope kei na Esia e Loma: “Ni rivarivabitaki na nodra vakayagataka na nodra galala ni sokalou na iVakadinadina i Jiova, nira na rawa ni vesu. E sega ni dua na vuna vinaka me caka kina qori vei ira na iVakadinadina i Jiova.”

Era sotava tiko na tacida e Rusia na veika tawadodonu, ia meda kerea mada ga vei Jiova me tokoni ira tiko ga mera “vosota kina na ka kece ena vosovoso kei na marau.”—Kolosa 1:11.