Ena ika19 ni Julai 2021, e vakataulewataka na Leninskiy District Court of the Kirov Region mai Rusia, ni cala o Brother Shamov, Brother Shchepin, kei Brother Udintsev. E totogitaki kina o Aleksandr me sauma e $5,618 (ilavo ni Merika), o Andrey me sauma e $6,688, o Yevgeniy ena sauma e $2,675.

Aleksandr Shamov

• Sucu: 1960 (Komarovo, Yasayasa o Kirov)

• Me baleti koya: Ratou le ono na veitacini. Ni se gone, rau sa takali na nona itubutubu. Dau qarava tu nodratou iteitei vakavuvale ni se yabaki ono. E tauri vola ena dua na koronivuli, qai dau ripeataka na tivi. Rau vakamau kei Nadezhda ena 1986. Dua na luvedrau yalewa. A tauvi koya na mateniuto qai sele tale ga. Gauna qo e taura tiko nona peniseni. Rau vulica kei Nadezhda na iVolatabu kei ira na iVakadinadina i Jiova ena veiyabaki ni 1990. Papitaiso ena 2000

Andrey Shchepin

• Sucu: 1991 (Korolev, Yasayasa o Moscow)

• Me baleti koya: Kila na dina mai vei rau nona itubutubu. Rau vakamau kei Ksenia ena 2015. E idinia. Papitaiso ena 2010

Yevgeniy Udintsev

• Sucu: 1949 (Kirov)

• Me baleti koya: Tauvi koya na mateniuto ni se gone. E idinia, dau caka kaukamea tale ga. Rau vakamau kei Elizaveta ena 1970. Rau vulica na iVolatabu vei taci Elizaveta ena 1991. Nona lomani Jiova e vukei koya me biuta na kana tavako kei na gunu. Papitaiso ena 1996

Ena ika26 ni Maji 2019, era curuma vakaukaua eso na vakailesilesi mai Rusia e 12 nodra vale na tacida e Kirov. Ratou mani beitaki kina o Aleksandr, Andrey, kei Yevgeniy. A vesu tu me rua na siga o Andrey. E kaya na dauveibeitaki ni okati me “vakavuna na tiko yavavala” na nodra ivakarau ni sokalou na tacida. Ratou beitaki gona na tacida qo, ni cala nodratou wili iVolatabu kei na lagasere ni soqoni.

Dua na ka e vukei ratou na tacida qo me ratou vosota na veivakacacani, ya na nodratou nuitaki Jiova, nona isoqosoqo kei na iVolatabu. Kena ivakaraitaki, e vakaukauataki Aleksandr ‘na levu ni ivakadinadina era vaka na o’ e tukuni ena Iperiu wase 12. E kaya o Aleksandr: “Era kila na dauveiqaravi ni Kalou ni vinakati mera vakabauta me rawa nira yaloqaqa qai vosota. Au dau vakasamataka gona vakatitobu na nodra ivakaraitaki niu sotava na ituvaki dredre. Era vosota e levu na itovo kaukaua kei na lewa ca. Qori e vukei au meu ‘vala vakaukaua meu taqomaka noqu vakabauta.’”—Juta 3.

E vakayaloqaqataki Andrey na kedra italanoa na tacida era yalodina ena nodra veiliutaki na Nazi e Jamani, kei na Soviet Union (Matanitu Makawa kei Rusia). E kaya: “Au qoroya vakalevu na nodra yaloqaqa.” E qoroya tale ga na sala e sauma kina o Jiova na nodra masu, kei na vakalougatataki ni nodra yalodina. Qori e uqeti koya me talaucaka na lomana vei Jiova. E kaya: “Au dau masulaka vei Jiova me solia vei au na yaloqaqa, io meu yaloqaqa vakalevu. . . . Eda bula tu qo ena iotioti ni veisiga. Na keda ituvaki e rawa kina nida vukei ira eso tale. Ena vukei keda tale ga meda nuitaki Jiova vakalevu.”

Meda nanumi ratou mada ga na tacida qori kei na nodratou vuvale. Eda kila ni o Jiova ena vakacegui ratou, ena ‘vakataudeitaki ratou tale ga ena cakacaka vinaka kece kei na vosa.’—2 Cesalonaika 2:17.