JUNE 28, 2024
RUSIA

Beitaki na Tacida ni Ratou Cala

SARAVA/ROGOCA

Ena ika24 ni June 2024, e kaya na mataveilewai na Elista City Court of the Republic of Kalmykia mai Rusia, ni cala o Sister Tsagan Khalgaeva, Sister Yekaterina Menkova, kei Sister Kishta Tutinova. Rau vakatatabutaki me rua na yabaki o Tsagan kei Yekaterina. E vakatatabutaki me tolu na yabaki o Kishta. Ratou na sega ni biu e valeniveivesu ena gauna qo.

Kedratou iTukutuku

Tsagan Khalgaeva

Sucu: 1978 (Lagan, Republic of Kalmykia)

Me baleti koya: E dauculacula

E vaqara na isau ni nona taro ena so na lotu. Tekivu vulica na iVolatabu kei ira na iVakadinadina i Jiova qai kunea kina na isaunitaro e veivakacegui

Papitaiso ena 2004

Ka e Tukuna

Cava o marautaka ena gauna dredre qo?

Au vakavinavinakataka na nodra dau masulaki au na mataveitacini. Eso na gauna niu yalolailai, au dau tagi ena masu vei Jiova niu sega ni kila na cava meu tukuna. Ia au kila nira nanumi au tiko ena masu na mataveitacini, e sauma tale ga o Jiova na noqu masu. Qori e uqeti au meu masulaki ira na taciqu era sotava tale ga na veika dredre. Noqu kila nira masulaki au tiko salavata kei na noqu masulaki ira, au vakila vakalevu kina na vakacegu. Au vakadeitaka kina nida vosota vata kece tiko na ituvaki dredre.

Yekaterina Menkova

Sucu: 1982 (Tavn-Gashun, Republic of Kalmykia)

Me baleti koya: E dauvakadidike ena ka vakasaenisi (laboratory assistant)

E vakamau ena 2009. E dua na luvena tagane

E qoroya na sala era muria kina na iVakadinadina i Jiova na ka e tukuni ena iVolatabu, e raica ni yaga tale ga vua na nona muria na kena ivakavuvuli. Papitaiso ena 2017

Ka e Tukuna

Na tikinivolatabu cava e vaqaqacotaka nomu nuitaki Jiova?

E vakaukauataki au na ka e tukuna na Same 8:3, 4: “Niu raica na nomuni lomalagi, na cakacaka ni qaqaloniligamuni, na vula kei na veikalokalo oni vakarautaka, na cava na tamata moni dau nanumi koya kina, kei na luve ni tamata moni kauaitaki koya kina?” Vakaivakatakarakara, o Jiova e bulia ena iqaqaloniligana na vuravura kei na ka kece e tu kina. Niu vakasamataka qori, e vakanuideitaki au ni veitokoni ga i Jiova au sega ni rerevaka kina e dua na ka.

Kishta Tutinova

Sucu: 1961 (Novolesnoy, Yasayasa o Astrakhan)

Me baleti koya: E dauculacula. E itubutubu le dua qai susuga e rua na luvena tagane

E susu ena vuvale lotu Buda. A vakavulici koya ena iVolatabu e dua na iVakadinadina i Jiova e dau lai cula tiko vua na nona isulu. E marau o Kishta ni vulica na sala me qarava kina na Kalou, ni sega ni muri na ivakarau vakavanua kei na vakabauta vakatevoro. Papitaiso ena 2003

Ka e Tukuna

Cava e vukei iko me donu tiko ga nomu rai?

E sivia ni va na vula noqu vakatatabutaki tu e vale. E dredre sara ga niu tiko vata kei luvequ tagane kei na nona vuvale ena dua ga na rumu, keitou le vitu taucoko. E sega ni vinaka ena noqu bula ni ka lailai na qai sega niu veilakoyaki vakalevu. Ia e yaga dina noqu dau vakasamataka vakatitobu na ka e tukuni ena Vosa Vakaibalebale 24:10: “Ke o yalolailai ena siga ni rarawa, ena lailai na nomu kaukaua.” Au qai liaca ni vakatau sara ga ena noqu rai na ka au rawa ni vakila, ya meu vakasamataka na veika dredre au sotava se meu raica ga na ka e vinaka. Au lai nanuma sara nona ivakaraitaki o Josefa. Ni tu e valeniveivesu, e sega ni vakalaiva na ituvaki e sotava me cudru kina. Qori e vukei au meu vakasamataka ga na veika vinaka au sotava, au vakila kina na marau.

Eda qoroya na nodratou ivakaraitaki ni vakabauta na tacida qo. Eda vakavinavinakataka ni kila tale tu ga o Jiova na veika dredre eda sotava, ena vakalougatataka na noda yalodina.—⁠Same 37:⁠18.

Veitaravi ni Gauna

Feperueri 16, 2023

Tekivu vaqaqai o Kishta
Feperueri 28, 2023

Caka na vaqaqara e vale. Vesu tu vakawawa o Kishta
Maji 1, 2023

Beitaki o Tsagan ni daubasulawa, mani cegu mai ena nona cakacaka. Sere mai o Kishta qai vakatatabutaki e vale
Julai 21, 2023

Laveti nona vakatatabutaki o Kishta
Tiseba 19, 2023

Tekivu vaqaqai o Yekaterina kei Tsagan, qai vakatabui me rau gole ina dua tale na vanua
Feperueri 9, 2024

Vakatabui o Kishta me gole ina dua tale na vanua
Epereli 1, 2024

Tekivu na veilewai
June 24, 2024

Beitaki ni ratou cala, ratou vakatatabutaki tale ga

Raica Tale Ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU