Ena ika31 ni Maji 2021, e vakataulewataka na Birobidzhan District Court of the Jewish Autonomous Region mai Rusia, ni cala o Sister Tatyana Zagulina. Sa vakatatabutaki me rua veimama na yabaki.

Tatyana Zagulina

• Sucu: 1984 (Koro o Selektsionnaya, Yasayasa o Trans-Baikal)

• Me baleti koya: Vulica na cula isulu vovou (fashion design). A cakacaka tu ena vanua ni ukutaki taukuku, e dauculacula tale ga, vakabibi na vinivo ni vakamau. E dau taleitaka na qito volleyball kei na tennis, na danisi kei na tali isulu

  E dau qoroya na veika bula qai vakabauta nira buli. Qori e uqeti koya me vulica na iVolatabu kei ira na iVakadinadina i Jiova. E papitaiso ena 2010. Rau vakamau kei Dmitriy ena 2012

Ena ika17 ni Me 2018, era curuma vakaukaua e 150 na ovisa e 22 na vale ni iVakadinadina i Jiova. Era vakatoka qori na ovisa me “Siga ni Lewa.” Tekivu mai na siga qori, era sa beitaki e 22 na tacida ena yasayasa qori. Ena ika6 ni Feperueri, 2020, eratou beitaki e ono na tacida yalewa ni ratou vakavuna na tikoyavavala, e dua vei ratou o Tatyana.

E tekivu veilewaitaki o Tatyana ena ika17 ni Seviteba, 2020. Ni waraka tiko na kena itotogi, e vakatabui me veilakoyaki ena yasayasa e tiko kina qai vakatabui me vakayagataka nona ilavo ena baqe.

E kaya o Tatyana ni vosota rawa tiko na ituvaki qori ena nona dau masu, wili iVolatabu kei na nona vuli vakataki koya. E rawa tale ga kina ni vunau qai tutaka nona vakabauta. E kaya: “Nira lako mai [na ovisa], au rere niu rogoca na vadugu ni itukituki e katuba, au mani masu sara. Oti qori au lomavakacegu sara ga.”

Kena ivakaraitaki, gauna e caka kina na veivaqaqai ena nona vale, e kaya o Tatyana vua e dua na ovisa, ni sa qai kaukaua ga nona vakabauta ena siga ya. E taroga na ovisa na vuna, e kaya o Tatyana ni sa vakadinadinataka tiko na ka e tukuna o Jisu ena Joni 15:20, e tukuni kina: “Na bobula e sega ni uasivia na nona turaga. Ke ra vakacacani au, era na vakacacani kemudou tale ga.” E kaya: “E tukuna vei au e dua vei ira na ovisa, ‘Vei au, na ka o tukuna qori, au sa vaka ga e dua vei ira na vakamatei Jisu.’ E vaqaqacotaki sara ga noqu vakabauta ena gauna qori, au marau qai vakila e dua na vakacegu levu. E vaka e tu sara ga e yasaqu o Jiova!” Ni se qai tekivu nona veilewai, e lomaleqa o Tatyana. Ia ni kerea vei Jiova me doudou, e kaya, “Au sa qai sega ni rere na vosa.”

Eda vakavinavinakataki Jiova nona tokona ira na tacida mai Rusia, kei na nona vakalougatataka nodra ‘cakacaka ena vakabauta, nodra sasaga e yavutaki ena loloma, kei na nodra vosota.’—1 Cesalonaika 1:2, 3.