Ena ika27 ni Janueri, 2020 ena rogoci nodratou kisi o Sister Venera, Sister Darya Dulova kei Brother Aleksandr Prianikov ena siti o Karpinsk. E vinakata na dauveibeitaki me rau tolu na yabaki e valeniveivesu o Brother Prianikov kei Sister Venera Dulova. Me rua tale ga na yabaki e valeniveivesu o Sister Darya Dulova.

Ena ika19 ni Epereli, 2016, rau wasea na itukutuku ena iVolatabu o Brother Prianikov kei Sister Venera Dulova vua e dua na tagane. E qai beitaki rau na tacida e dua na wekai tagane qori ni rau butako, e mani qirita sara na ovisa. Oti rau kau sara ina tabana ni ovisa. Era taura na ovisa na mawe ni qaqalo ni ligadrau, ra taura tale ga nodrau ivola vakaivolatabu.

Oti e rua na yabaki rau vesu tale me rau lai vakatarogi. E tauri tale ga nodrau talevoni kei na so nodrau ivola. E lesia sara na turaganiovisa e dua na parofesa ni cioloji me vakadikeva na itukutuku e tiko ena nodrau talevoni. E kaya na parofesa ni itukutuku kece e tiko kina e baleta nodra ivakavuvuli na iVakadinadina i Jiova. Qori na vuna e vinakata kina na dauveibeitaki me caka na veilewai. E vakadonuya kina na mataveilewai mera vaqaqara na ovisa e nodrau vale.

Ni caka tiko na vaqaqara e nona rumu o Sister Dulova, era taura na ovisa na iyaya vakalivaliva, ivola kei na itaba. A vakatarogi tale ga na luvena yalewa, e yabaki 18. Era vaqaqara tale ga na ovisa ena nodra vale na wekana, kei na rumu nei Brother Prianikov.

Ena ika16 ni Epereli, 2019, ratou vaqaqara e nona vale o Brother Prianikov e ono na ovisa. Ratou taura nona iyaya vakalivaliva kei na so tale na iyaya.

Ena ika23 ni Julai, 2019, e vesu qai vakatarogi o Sister Darya Dulova ena kisi me baleti tinana, kei Brother Prianikov. Ena Seviteba, 2019 ratou beitaki ni ratou cala.

Ena vukudratou na tolu na tacida qo, kei ira na le 300 tale na tacida era beitaki tiko nira basulawa, ra vesu tale ga e Rusia, meda masuta ena nuidei: “Me vakasinaiti kemuni mada ga na Kalou na vu ni noda inuinui, ena marau kece kei na vakacegu ena vuku ni nomuni vakabauti koya, me levu tiko ga kina na nomuni inuinui ena kaukaua ni yalo tabu.”—Roma 15:13.