NOVEBA 29, 2023
RUSIA

Beitaki ni Ratou Cala na Tacida

SARAVA/ROGOCA

Ena ika23 ni Noveba 2023, e tauca na mataveilewai na Balakovskiy District Court of the Saratov Region mai Rusia, na lewa me baleti Brother Aleksey Bogatov, Brother Yevgeniy Fomashin, Brother Vladimir Mavrin, Brother Andrey Murych, kei Brother Sergey Tyurin. Ratou beitaki na tacida kece qori ni ratou cala. O Aleksey kei Vladimir rau vakatatabutaki me ono na yabaki. O Andrey, Sergey, kei Yevgeniy ratou totogitaki me ratou sauma e $3,362 na ilavo ni Merika. Ratou na sega ni biu e valeniveivesu ena gauna qo.

Kena iTukutuku

Aleksey Bogatov

Sucu: 1960 (Baklushi, Yasayasa o Ulyanovsk)

Me baleti koya: E dau draiva ena lori ni valenibula e cicivaki ira na tauvimate

Rau vakamau kei Lyubov ena 1982. E tolu na luvedrau

Na nona vulica na iVolatabu kei ira na iVakadinadina i Jiova e vukei koya me kila na sala ena kauta mai kina na Matanitu ni Kalou na lewadodonu ina kawatamata. Papitaiso ena 1994

Ka e Tukuna

E tokoni iko vakacava o Jiova ena gauna o vesu tu kina?

Na imatai ni vula ni noqu vesu, a sega ni dua na noqu iVolatabu. Ia e tiko ga na noqu peni kei na ivola. Au masuti Jiova e veisiga me vukei au meu vakananuma eso na tikinivolatabu. Ni qai cava na vula au sa vola rawa e 112 na tikinivolatabu. Au vulica kina niu wilika wasoma na iVolatabu qai vakasamataka vakatitobu, e vukei au na yalo tabu i Jiova meu vakananuma tale mai. Au vakavinavinakataka na veivuke ena tikina ya o Jiova.

Yevgeniy Fomashin

Sucu: 1977 (Balakovo)

Me baleti koya: E daunilivaliva

E taleitaka na yalayala ena iVolatabu me baleta na vakacegu kei na duavata e vuravura. Papitaiso ena 2013. E vulica na vosa vagalu me vukei ira na didivara ena nona itikotiko

Ka e Tukuna

E vukei iko vakacava na nodra ivakaraitaki na tacida era vesu ena veigauna sa oti?

Gauna au vesu tu kina, au lai vakasamataka ni ratou a vesu tale ga ena valeniveivesu ya o Brother Konstantin Bazhenov, Brother Aleksey Budenchuk, Brother Gennadiy German, Brother Roman Gridasov, Brother Feliks Makhammadiyev, kei Brother Aleksey Miretskiy mai na 2018 ina 2019. E vakayaloqaqataki au na nodratou ivakaraitaki ni vakabauta. E uqeti au tale ga nodra ivakaraitaki e levu na tacida e vuravura raraba, era yalodina tu ga nira sotava na ituvaki dredre. E vaka ga keimami vosota vata kece tiko na ituvaki dredre qo.

Sergey Tyurin

Sucu: 1994 (Balakovo)

Me baleti koya: E daunilivaliva

Vakavulici koya ena iVolatabu o nona bu. E vakadeitaka ni na marautaki na bula ke muri na ivakavuvuli vakaivolatabu. Papitaiso ena 2012

Rau vakamau kei Yelizaveta ena 2018

Ka e Tukuna

Cava o vulica ni o vesu ena vuku ni nomu vakabauta?

E tolu na ka au vulica. Kena imatai, o Jiova ena tokoni au tu ga. E raica na ka au vinakata dina, qai kila na gauna donu me solia kina. Kena ikarua, e yaga sara ga noqu nuitaka na yalayala i Jiova ni vukei au meu lomavakacegu. E sega ni rawarawa na veitusaqati, ia e lekaleka wale ga ni vakatauvatani kei na veivakalougatataki tawamudu ena gauna se bera mai. Sa voleka na gauna meu na sega ni vakasamataka tale na veika dredre qo. Kena ikatolu, e talei duadua na noda duavata vakamataveitacini. Na veika kece qori ena rawarawa kina noda vosota na ituvaki dredre da qai kua ni vakawalena.

Na nodratou ivakaraitaki na tacida yalodina qo, e vukei keda meda kila nida vakararavi ena kaukaua ni Kalou ena rawa nida vosota noda vakararawataki ena vuku ni itukutuku vinaka.—⁠2 Timoci 1:⁠8.

Veitaravi ni Gauna

Feperueri 11, 2022

Beitaki ni ratou daubasulawa
Maji 23, 2022

Era vaqaqara na vakailesilesi ni FSB ena nodratou vale na tacida. Ratou vakatarogi qai lai vesu
Maji 25, 2022

Ratou vesu tu vakawawa
Janueri 23, 2023

Ratou sere mai qai vakatabui me ratou gole ina dua tale na vanua
Julai 21, 2023

Tekivu veilewaitaki
Noveba 23, 2023

Beitaka ni ratou cala

Raica Tale Ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU