Ena siga Lotulevu na ika4 ni Julai, 2019 e kacivaka na mataveilewai ni yasana e Ordzhonikidzevskiy ena siti o Perm, e Rusia na cala e beitaki kina o Brother Aleksandr. E totogitaki tale ga me sauma e rauta na $4,731 na ilavo ni Merika.

Ena yakavi na ika22 ni Me, 2018 era vesuki o Brother Solovyev na ovisa ena vanua ni wawa sitima ni rau lesu mai vanuatani kei watina o Anna. Era vesuka na ligana, ra qai vesuki koya tu vakawawa e valeniveivesu. Era kauti Sister Solovyev tale ga na ovisa ena dua tale na motoka. Era vaqaqara tale ga e nodrau vale ena bogi taucoko, kauta na itaba, iyaya vakalivaliva, kei na vica na ilavelave ni iVolatabu.

Ni oti nona vakatarogi era sereki Sister Solovyev na ovisa, e sega tale ga ni totogitaki. Ia e beitaki o Brother Solovyev ni beca na lawa, mani totogitaki me kua ni biuta nona vale ena ika24 ni Me ina ika19 ni Noveba, 2018. Ni wawa veilewai tiko, e vakatabui tale ga eso na ka me kua ni cakava, kei na vanua me kua ni lako kina.

Era kerea nona loya o Brother Solovyev me rogoci tale na ka e beitaki kina. Era sa volavola tale ga ena matabose kei vuravura e qarava nodra beitaki vakatawadodonu na lewenivanua na United Nations Working Group Against Arbitrary Detention.

Eda na sega “ni rerevaki” ira na meca ni tubu na veivakacacani ena vanua me vakataki Rusia. Eda na nuitaki Jiova ga ni na vakarautaka na ka eda vinakata meda vosota kina me yacova nona siga levu ni veivakabulai sa roro tiko mai.—Filipai 1:28