Ena ika2 ni June 2 2021, e kaya na Zeya District Court of the Amur Region mai Rusia, ni cala o Brother Vasiliy Reznichenko. Ena vakatatabutaki me rua na yabaki, ena sega ni biu e valeniveivesu ena gauna qo.

Vasiliy Reznichenko

• Sucu: 1942 (Murovka, Yasayasa o Primorye)

• Me baleti koya: Ratou le lima na veitacini, e gone duadua o koya. Vulica me draivataka na katavila, daunivakasala vei ira na kavetani ni waqa, e mekeniki tale ga. Oti nona veiqaravi ena mataivalu kei na nona daunivakasala vei ira na kavetani ni waqa, a lai dua sara na kavetani ni waqa. Vakacaucautaki ena ka e cakava qai soli vua na icavuti me “Veteran of Labor of the Soviet Union”

  Rau vakamau kei Valentina ena 1969. E tolu na luvedrau tagane. A wasea vua o Valentina eso na ka dina vakaivolatabu ena veiyabaki ni 1990. Ni mai kila na inaki ni Kalou me baleta na vuravura, e vulica sara na iVolatabu qai marautaka vakalevu. Papitaiso sara o Vasiliy me iVakadinadina i Jiova ena 1996. Takali o watina ena 2016

Ena ika21 ni Maji 2019, era vaqaqara na ovisa ni tauni o Zeya ena nona vale o Brother Vasiliy Reznichenko. Ratou kauta nona laptop, talevoni, kei na so na ka vakaivola. Tekivu mai na gauna qori, e beitaki koya na matanitu o Rusia ni dua vei ira na dau vakavuna na “tikoyavavala.” E vakatabui me taura nona ilavo mai na baqe, me kua tale ga ni biuta na yasayasa qori.

E nuitaki Jiova tiko ga o Vasiliy. E donu tu ga nona rai, ni dei tiko ena nona ituvatuva vakayalo. Qori nona dau wilika e veisiga na iVolatabu, kei na dikevi ni tikinivolatabu e veimataka. E vakavinavinakataka tale ga na nodra veitokoni na tacina vakayalo.

E kaya: “Oti e dua na siga nodra vaqaqara kei na nodra vakatarogi au na ovisa, era mai sikovi au na tacida mai na ivavakoso. Eso vei ira a caka tale ga na vaqaqara [ena nodra vale.] Oti e rua na siga, era mai sikovi au tale ga eso na tacida mai na so tale na tauni voleka. E rawa sara ga nira vesu ena ka era cakava qo. Ia e vakayaloqaqataki au vakalevu na nodra veisiko. E dau tonawanawa na wainimataqu niu vakasamataka lesu na ka era cakava.” E kaya: “Na veika au sotava qo e vaqaqacotaka noqu veiwekani kei Jiova. Keirau sa qai veivolekati ga.”

E veivakacegui qai vakayaloqaqataki Vasiliy na ka e volai ena Iperiu 13:5. E kaya o Vasiliy: “Au vakadeitaka meu nuitaka tiko ga na yalayala i Jiova: ‘Au na sega sara ni laivi iko, au na sega tale ga ni biuti iko.’” Eda nuidei ni o Jiova ena tokoni ira tiko ga, na tacida era vakacacani ena vuku ni nodra vakabauta.