Ena ika21 ni Janueri 2021, e tauca na mataveilewai ni yasana na Obluchenskiy District Court of the Jewish Autonomous Region e Rusia, ni cala o sister Anastasiya Sycheva. Ena vakatatabutaki me rua veimama na yabaki. Kena ibalebale, ena gauna qo ena sega ni bala e valeniveivesu.

Anastasiya Sycheva

• Sucu: 1977 (Teploozyorsk, Jewish Autonomous Region)

• Kena italanoa: Ratou le va na veitacini, e le rua rau sa takali. E vakoroi ena vuli vuniwai. E vuniwai ni bati, e cakacaka tale ga ena valenibula era qaravi kina na lomabibi vakasivia (psychiatric hospital.) Ni takali oti o tuakana, e susugi rau sara na luvei tuakana. Qaravi tinana tale tu ga me yacova nona takali

  Ni se goneyalewa, e dau vakasamataka vakalevu na vuna sa rui lekaleka kina na bula. Qori e uqeti koya me vulica na iVolatabu. E saumi sara kina nona lomatarotaro. Ena 1994, e papitaiso sara me dua na iVakadinadina i Jiova

Ena Okotova 2019, era kaya na vakailesilesi e Rusia ni o Anastasiya e dua vei ira e vakavuna na tiko yavavala. Ena ika25 ni Seviteba 2019, era vaqaqa na nona kisi na Investigative Department of Russia’s Federal Security Service (FSB) e Birobidzhan. E beitaki ni vakaitavi tiko ena nodra soqoni na iVakadinadina i Jiova, e tukuna tale ga vei ira eso tale na nona vakabauta.

Ena gauna ni veilewai era vakaraitaka na dauveibeitaki na katokatoni, kei na vidio ni nona vakamacala tiko ena talevoni o Anastasiya ena gauna ni soqoni. Era kaya tale ga ni ka e katoni qori, e vakaraitaka ni vakavuna tiko o koya na tiko yavavala. Ia e vakayagataka o Anastasiya na gauna qori me wasea kina na ka dina. E kaya ni gauna ni soqoni era vakavulici kina na iVakadinadina i Jiova ena sala mera bucina kina na yalololoma, veivosoti, vosovoso kei na so tale na itovo vaKarisito.

E kaya tale ga na sala e vukei koya kina na iVolatabu: “Au sa lewai nikua ena vuku ni noqu vakabauta, kei na noqu vakaitavi wasoma ena ka ni lotu. Oya na noqu dau wilika na iVolatabu, lagasere vei Jiova, kei na noqu dau masu.

“Au na sega vakadua ni guilecava na ka e kaya na Iperiu wase 10, tikina e 24 kei na 25, ‘Meda dau veinanumi nida veivakauqeti ena loloma kei na caka vinaka,meda kua ni biuta na noda soqoni vata me vaka e nodra ivalavala eso, ia meda veivakayaloqaqataki, io me vakalevu nida raica ni sa voleka mai na siga.’ Ke sa uqeti au na Kalou Kaukaua Duadua o Jiova, meu soqoni qai wili iVolatabu vata kei ira noqu itokani, na taciqu vakayalo, me keimami veilomani tale ga. Au na cakava na ka kece e tukuna. Au lomani koya vakalevu, au dokai koya, au vinakata tale ga meu qaravi koya.”

Eda marau ni dei tu ga nona vakabauta o Anastasiya. E yaloqaqa qai donu tiko ga nona rai. Meda masulaka ni na marau qai vosota tiko ga.—Jemesa 1:2, 3.