Ena ika29 Seviteba, 2020, * ena tauca na mataveilewai ni yasana o Pervorechenskiy, e Vladivostok, na lewa me baleti Sister Yelena Barmakina. Ena rawa ni vesu me tolu na yabaki e valeniveivesu. Ni waraka tiko nona veilewai, ena rogoci tale tiko ga na kisi e beitaki kina na watina o Dmitriy.

Yelena Barmakina

• Sucu: 1967 (Cherepanovo, yasayasa o Novosibirsk Region)

• Kena italanoa: E qaravi rau tiko nona itubutubu itabaqase kei nona bu. Taleitaka na veitaba mani kenadau sara kina. Taleitaka tale ga na taubale vakabalavu kei na sisili

• Ena gauna e vulica kina na iVolatabu kei ira na iVakadinadina i Jiova, e vakadinadinataka na kena vakayacori na parofisai ena iVolatabu. E vakadeitaka kina na kaukaua ni Kalou E dei tiko ga nona vakabauta ena sala e sauma kina o Jiova nona masu. Rau vakamau kei Dmitriy ena 2006

Ena ika28 ni Julai, 2018, era curuma vakaukaua na ovisa na vale nei nona bu e yabaki 90. Era vakamatavulo ra qai tauri dakai tu. Rau a tiko vata kei koya ena gauna qori o Sister Barmakina kei watina o Dmitriy. E kau o Brother Barmakin qai vesu tu vakawawa. Era vakarerei Sister Barmakina na ovisa, ra qai kaya vua ni na vesu tale ga.

Oti e dua na yabaki, era sogota na vakailesilesi nona akaude ni baqe o Sister Barmakina. Ena ika6 ni Okosita, 2019, e kaya e dua na dauveivaqaqai ni okati me daubasulawa o Sister Barmakina ena nona wilika na iVolatabu, masu qai sarava na vunau ena vidio. E kaya nona loya ina mataveilewai me talaci nona kisi baleta ya e sega ni basulawa, e okati ga me sokalou. Ia e sega ni via rogoca qori na turaganilewa e duavata ga ena ka era tukuna na dauveibeitaki, ni vakaitavi tiko o Sister Barmakina ena itavi e vakavuna na tiko yavavala qai vakatabui ena lawa o Rusia.

E lomabibi vakalevu o Sister Barmakina ena ituvaki e yaco qo. E sega ni raici watina tu me 447 na siga ni vesu tu vakawawa. Kuria ya, e dredre tale ga me kunea o Sister Barmakina e dua na cakacaka saumi de dua ena qai kacivi me lai vakatarogi se veilewaitaki.

E vukei keda na veika eda vulica ena iVolatabu, meda kua ni kurabuitaka na nodra “sasaga vakaukaua” na vakailesilesi e Rusia mera tarova nodra yalodina na tacida. Ia eda nuidei ni o Jiova ena ‘nodra ivakaruru, ena vu ni nodra kaukaua talega.’—Same 118:13, 14.