E vakadeitaka e dua na ilawalawa ni vunilawa ena Matabose kei Vuravura, ni nona vesu qai beitaki o Brother Dmitriy Mikhaylov, e dusia na “veivakaduiduitaki e yavutaki ena lotu.” E beci tale ga kina na dodonu ni lewenivanua e veiyasa i vuravura. Era veivakaroti kina na vunilawa, ina matanitu o Rusia me tinia na veibeitaki vakailasu e cakava tiko vei Brother Dmitriy Mikhaylov.

Era vakatokai na ilawalawa qori na Working Group on Arbitrary Detention (WGAD). Era vakarautaka tale ga e dua na ivakamacala e rauta ni 12 na tabana. Era kaya kina na veika e cakava o Brother Mikhaylov, “e sega ni uqeta na tiko yavavala. E sega ni dua na ivakadinadina e vakaraitaka ni uqeta o koya, se o ira na iVakadinadina i Jiova e Rusia na tiko yavavala se ivalavala voravora.”

E tinia me baleti Brother Mikhaylov ni “vakayagataka tiko ga nona dodonu ni sokalou, sega gona ni dodonu me totogitaki se vesu tu vakawawa.” E dodonu me saumi koya na matanitu ni sega tu ni cakacaka ena nona vesu, kei na kena vakadredretaki vua na galala ni veitosoyaki. Ia se sega ni dua na cala e vakadinadinataki ni cakava.

E vakadeitaka tale ga na isoqosoqo na WGAD me baleti Brother Mikhaylov, ni levu tale vakataki koya era vakacacani vakatawadodonu ena vuku ni nodra vakabauta. O Brother Mikhaylov e “dua wale ga vei ira na vica vata na iwiliwili iVakadinadina i Jiova e Rusia era vesu, totogitaki, ra qai beitaki nira basulawa ena vuku ni nodra vakayagataka tiko ga na dodonu ni sokalou e soli tu vei ira”—qori na dodonu e kilai e veiyasa i vuravura. E sega ni duavata na isoqosoqo na WGAD ena nodra vakacacani na tacida e Rusia. E kaya na nodra sasaga e sega ni vakatabakidua ga ena nona vesu vakatawadodonu o Brother Mikhaylov, ia vei ira kece na iVakadinadina i Jiova era “sotava tale ga na ituvaki e tiko kina o Mr. Mikhaylov.”

E tekivu vulica na iVolatabu o Brother Mikhaylov ni se itabagone. E papitaiso sara ena yabaki 1993, ni se qai yabaki 16. E vakawatitaki Yelena ena 2003, rau qaravi Jiova vata tale ga.

Ena 2018, rau qai kila o Brother kei Sister Mikhaylov ni sa vakavula nodra dau katona tiko na vakailesilesi na nodrau qiri kece, ra vakamuria tale ga ena vidio na ka rau cakava tiko. Ena ika19 ni Epereli, 2018 e tauyavutaka na Komiti ni Veivaqaqai e Rusia (Investigation Committee of the Russian Federation), e dua na kisi me beitaki kina o Brother Mikhaylov, ra lai vaqaqara tale ga e nona vale na ovisa ena yasayasa o Ivanovo. Oti e dua na vula, e vesu, qai beitaki ni veitokoni ena cakacaka e vakavuna na tiko yavavala. E 171 na siga se voleka ni ono na vula, nona vesu tu vakawawa ni bera ni sere. Ia e sega ni vakatarai me veilakoyaki, se veivosaki ni se vaqaqai tiko nona kisi.

E solia na isoqosoqo na WGAD ina matanitu o Rusia e ono na vula, me vakamacalataka ke sa boko na kisi e beitaki kina o Mikhaylov, sa saumi tale ga na kena isau kece. Me kilai tale ga o ira na beitaki koya tiko.

Na ka e cakava qo na isoqosoqo na WGAD ena rairai veisau tale ga kina na kisi me baleti Brother Teymur Akhmedov, e Kazakhstan. A vesu ena 2017, qai totogitaki me lima na yabaki ena vuku ni nona wasea tiko nona vakabauta vei ira eso tale. Levu na sala ra qara veivuke kina nona loya o Brother Akhmedov, ra mani kerekere ina isoqosoqo na WGAD. Ena ika2 ni Okotova, 2017 e sega ni duavata na WGAD ena ka era cakava na vakailesilesi ni Kazakhstan, mani vakatulewataka me sere o Brother Akhmedov. Oti ga e ono na vula, e vakarogoya na peresitedi ni Kazakhstan ni cala na veika e caka vei Brother Akhmedov. E mani sere ena ika4 ni Epereli, 2018.

Se mani cava ena cakava na matanitu o Rusia ena vakatulewa ni WGAD me baleti Brother Mikhaylov, eda nuitaka tu ga na iyalayala qo: “E marau na tamata e vakaruru [vei Jiova].” Meda masuti Jiova ni na taqomaki ira tiko ga na tacida e Rusia era beitaki ena basulawa, mera rawa ni yaloqaqa tiko ga ni nuitaki Koya, o ira kece na cakava qori era na “sega ni leqa ena ka vinaka.”—Same 34:8, 10.