Ena ika9 ni Seviteba 2019, e kaya na maramanilewa o Svetlana Anatolyevna Prokofyeva ena Mataveilewai ni Rogokudru e Kaluga, ni cala na lewa e tau me baleti Brother Dmitriy Kuzin me wawa veilewai e valeniveivesu.

E duatani duadua na lewa nei Prokofyeva baleta e dredre mera kaya vakadodonu na loya ni cala na lewa ni mataveilewai vei ira na iVakadinadina i Jiova e Rusia. E kaya o maramanilewa ni sa beca vakavica na lawa na mataveilewai ni yasana. E vakalialiai Brother Kuzin na mataveilewai ni yasana ena nona vakabauta vakalotu, e sega ni soli tale ga vua na gauna me vakamacala. E kaya tale ga o Prokofyeva ni cala sara ga na lewa ni mataveilewai ni yasana.

E vesu o Brother Kuzin ena ika26 ni June, 2019 nira curuma vakaukaua nona vale na vakailesilesi ni Federal Security Service (FSB) e Kaluga. Oti e rua na siga, e lewa na Mataveilewai ni Yasana e Kaluga me wawa veilewai e valeniveivesu o Brother Kuzin me rua na vula. Ena ika19 ni Okosita, e kaya na dauveivaqaqai ni FSB ena mataveilewai ni yasana, me toso tale ena rua na vula nona wawa veilewai o Brother Kuzin e valeniveivesu. E duavata kina na mataveilewai.

E qai kerea o Brother Kuzin me rogoci nona kisi ena mataveilewai cecere ni yasana, e kena maramanilewa o Prokofyeva. E raica o koya ni beca na lawa o turaganilewa ni mataveilewai e ra, mani kaya me rogoci tale mada nona kisi o Brother Kuzin ena mataveilewai qori, ia me qarava e dua tale na turaganilewa. Ena ika23 ni Seviteba, e lewa e dua tale na turaganilewa ena mataveilewai e ra me wawa veilewai me rua na vula o Brother Kuzin e valeniveivesu.

E Kalou yalodina qai lewadodonu o Jiova, eda nuidei ni na tokoni ira tiko ga na mataveitacini e Rusia era nuitaki koya.—Vakarua 32:4, 9-11.