Me tekivu mai na gauna e vakatabuya kina o Rusia noda cakacaka na iVakadinadina i Jiova ena Epereli 2017, era sa vesu e sivia na 500 na tacida nira beitaki nira vakavuna na tiko yavavala. Rauta ni 40 na tacida era sa bala e valeniveivesu, e 15 ratou totogi ilavo. E sivia na 80 era beitaki nira cala, ia era se sega ni biu i valeniveivesu. Era na qai biu ga i valeniveivesu ga ke ra beca na vakatatabu e soli vei ira. Sa bau veivakalolomataki dina.

Ena lawa kei Rusia, e rawa ni tauca na turaganilewa na mataqali totogi qori. Ena vakatatabutaki o koya e cala ena loma ni dua na gauna. Ke mani beca na vakatatabu, ena rawa ni biuti koya sara na mataveilewai ina valeniveivesu me cola na dede ni totogi sa lavaki oti vua.

E vakacava na kedra ituvaki na tacida era totogitaki va qori? E tokoni ira vakacava o Jiova? Keitou vakataroga eso vei ira na tacida qori. Era totogitaki mai na rua ina ono na yabaki. Era vakamacalataka na veika dredre era sotava kei na sala e tokoni ira kina o Jiova.

Na ka ratou tukuna na tacida qo, e uqeti keda meda masulaki ira vakalevu na tacida era sotava na ituvaki va qori. E rawa sara ga nida masulaki ira yadudua kei na nodra vuvale. Eda vakadinadinataka ena ka era sotava ni o Jiova e dau rogoca na masu va qori qai tokoni ira na yalodina vua ena veimataqali tuvaki dredre era sotava.—2 Korinica 1:3, 4.