Ena 18 na vula sa oti era curuma vakaukaua na ovisa kei ira na Federal Security Service (FSB), e 613 nodra vale na tacida e Rusia. Ena Janueri 2019, era curuma vakaukaua na vakailesilesi e 332 na vale, e tubu tale qori mai na 281 na vale e curumi vakaukaua ena 2018.

Ena vica ga na vula qo e tubu na iwiliwili ni nodra vale na tacida era curuma vakaukaua na vakailesilesi. E 71 na vale e curumi vakaukaua ena June, e 68 tale ga e curumi vakaukaua ena Julai. E tubu cake tale na iwiliwili qori ni vakatauvatani ena 2018 ni 23 ga na vale e curumi vakaukaua e veivula.

Era vakamatavulo na ovisa, ra vakaiyaragi vinaka tale ga nira curuma vakaukaua e dua na vale se rumu. Nira curu e lomanivale era na dodoka na dakai e matadra na tacida, wili kina o ira na gone kei ira na itabaqase. E vaka ga era cakava e dua na cala bibi. Oya na vuna e levu na kenadau era duavata kei Dr. Derek H. Davis, na dairekita e liu ni univesiti ni veika vakalotu kei na matanitu (Baylor University’s J.M. Dawson Institute of Church-State Studies). E kaya: “Na matanitu o Rusia e beitaki ira tiko na iVakadinadina i Jiova nira tamata vakarerevaki. Ia na ivalavala kaukaua era cakava tiko na vakailesilesi vei ira na yalomalua qori, e ivakadinadina matata ni o ira ga era tamata vakarerevaki.’”

Na levu ga ni vale era curuma vakaukaua na vakailesilesi, e tubu tale ga na kisi ni basulawa era beitaki kina na tacida. Era le 244 na tacida era beitaki tiko ena gauna qo nira daubasulawa e Rusia kei Crimea. Ena Tiseba, 2018 e rauta na 110 na kisi ni basulawa, ia qo e sivia ni vakaruataki na iwiliwili qori. O ira kece na tacida era beitaki qori, e le 39 era vesu tu vakawawa, le 27 era vesu tu e vale, e sivia tale ga na le 100 era vakatatabutaki.

Era se taketetaki tiko na tacida ena gauna qo vei ira na vakailesilesi, ia eda na sega ni ‘yavalati ena vuku ni veivakararawataki qori.’ Eda vakayaloqaqataki ga ena irogo ena vuku ni nodra yalodina kei na nodra vosota na tacida. Eda lagiti Jiova qai vakavinavinakataki koya ni sauma noda masu me baleti ira na tacida ena levu na sala, eda nuidei talega ni na tokoni ira tiko ga.—1 Cesalonaika 3:3, 7.