E macala ena dua na itukutuku nira curuma vakaukaua na ovisa e 110 na nodra vale na tacida ena yasana o Voronezh ena ika13 ni Julai 2020, nira vakadakai tu. Me tekivu mai na 2017, e laurai ni qo e dua na iwiliwili levu duadua ni nodra vale na iVakadinadina i Jiova e curumi vakaukaua ena dua ga na siga. Rau mokulaki qai vakalialiai e rua na tacida o Aleksandr Bokov kei Dmitrii Katyrov, ni rau bese ni solia na nodrau password ni talevoni.

E vakarota qori na mataveilewai ni Tikina o Leninsky e Voronezh. Era yanaraka na ovisa na nodra vale na mataveitacini ena vitu na siti, taoni kei koro ena yasana ya. Era kau eso na tacida tagane ina siteseni ni ovisa mera lai vaqaqai.

Ena siga tarava ena ika14 ni Julai 2020, e vakatulewataka na Mataveilewai ni Yasana o Leninsky mera vesu ni wawa veilewai e tini na tacida tagane qo me yacova na ika3 ni Seviteba, 2020: o Aleksei Antiukhin e yabaki 44, o Sergey Bayev e yabaki 47, o Iurii Galka e yabaki 44, o Valeriy Gurskiy e yabaki 56, o Vitalii Nerush e yabaki 41, o Stepan Pankratov e yabaki 24, Igor Popov e yabaki 54, Evgenii Sokolov e 44, Mikhail Veselov e yabaki 51, kei Anatoliy Yagubov e yabaki 51.

E dina ga ni sa ripotetaki mai nira yanaraki e 110 na vale, era tukuna mai e 100 na vuvale na iVakadinadina i Jiova ni curumi vakaukaua na nodra vale qai yanaraki. E rairai na toso cake tale na iwiliwili qori. E dredre me caka na veitaratara vei ira na tacida qori ni sa kau laivi mai vei ira na nodra talevoni kei na kompiuta.

Na iwiliwili levu ni vale e yanaraki ena dua na siga e caka ena ika10 ni Feperueri, qori ni curumi vakaukaua e 50 na vale e nodra na iVakadinadina i Jiova e Transbaika. Me tekivu mai na macala ni Mataveilewai Cecere ena 2017, e curumi vakaukaua qai yanaraki na nodra vale e sivia na 1,000 na tacida.

Eda sega ni kurabuitaka na ka e yaco qori vei ira na tacida e Rusia kei na so tale na vanua ni sa parofisaitaka tu na iVolatabu. Meda masulaki ira tiko mada ga na tacida, eda nuitaka ni na solia vei ira o Jiova na kaukaua mera yalodina.—1 Pita 4:12-14, 19.