Ena ika27 ni Seviteba 2021, e kaya na mataveilewai na Leninskiy District Court of Ufa mai Rusia, ni cala o Brother Anatoliy Vilitkevich. Ena vakatatabutaki me rua na yabaki.

Anatoliy Vilitkevich

• Sucu: 1986 (Yasayasa o Khabarovsk)

• Me Baleti Koya: E cakacaka vakamatai. Rau vakamau kei Alyona ena 2008. Rau dau taleitaka na keba e veikau, kei na taubale ena veiulunivanua

  Ni se gone, rau vakavulici koya na nona itubutubu me lomana na Dauveibuli. E taleitaka vakalevu na yalayala ni Kalou, ya nida na veiyaloni kei ira na manumanu ena dua na gauna. Papitaiso sara ena 1997 ni se yabaki 11

Ena ika8 ni Okosita 2018, e mai okati tale ga o Brother Anatoliy Vilitkevich me dua vei ira na batikadi ni Rusia. Me vakataki Brother Dennis Christensen, o Anatoliy tale ga a dua vei ira na imatai ni tacida era wawa veilewai e valeniveivesu ena gauna e vakatabuya kina noda cakacaka na Mataveilewai Cecere kei Rusia ena Epereli 2017.

Era biuta lo na dauveivaqaqai na itaba ena nodrau vale o Anatoliy, kei Alyona. Era qai kaya ni cala vakalawa nona veivosakitaka na iVolatabu, kei ira nona itokani. E beitaki gona o Anatoliy ni liutaka tiko e dua na isoqosoqo e vakavuna na tikoyavavala.

Gauna sa kau kina o Anatoliy, e kaya sara ena veibeci e dua na ovisa vei Alyona me “vaqara e dua tale na watina.” Ni vakatarogi o Anatoliy, e kaya: ”Dua na ka noqu nuiqawaqawa. Ratou kaya keu sega ni vakadinadinataka na ka au beitaki kina, ena vakaloloma ga kina o watiqu, kei ira na tacida era dau soqoni tiko i vale. Ratou tukuna vakavica vei au ni na vesu tale ga o watiqu. Au dau masu ga vei Jiova, qai kerei koya me solia vei au na vakacegu ni vakasama ena gauna qori.”

E wawa veilewai tu i valeniveivesu o Anatoliy me rua na vula, e voleka ni ciwa na vula nona vakatatabutaki i vale, qai vakatabui me veilakoyaki me sivia e dua veimama na yabaki. Gauna e vesu tiko kina, e dau vola ena dua na ivola na nodra ivakaraitaki eso ena iVolatabu era vakacacani tale ga. E kaya: “Au vulica ni o Jiova e sega ni kauta laivi na veika dredre era sotava, ia e tokoni ira tu ga. Qori e vakayaloqaqataki au vakalevu, qai vakadeitaka ni na tokoni au tale ga va qori o Jiova. E bibi ga meu yalodina tiko ga.” E vakayaloqaqataki koya tale ga na ivola nei watina. E kaya o Anatoliy: “Dua na gauna e volavola mai o Alyona qai vakauta mai eso na keirau itaba kei ira na mataveitacini, wili kina o ira na wekai keirau voleka. Na veiyakavi kece au na dau vakaraica na itaba qori, qai vakasamataka eso na ka vinaka au cakava vata kei ira yadua. E vaka sara ga era tu e yasaqu.”

E vakayaloqaqataki keda kece na nodrau ivakaraitaki ni yalodina o Anatoliy kei Alyona. Dina nira tusaqati vakalevu na tacida mai Rusia, ia eda marau nira sa qai volekati Jiova ga vakalevu. Eda vakavinavinakataki Jiova nona dau rogoca na noda masulaki ira.—2 Korinica 1:11.