Ena imatai ni Maji 2021, a ena tauca na mataveilewai na Priokskiy District Court of Nizhny Novgorod e Rusia, na lewa me baleti Brother Sergey Verkhoturov. E vesu tu me vitu na yabaki.

Sergey Verkhoturov

• Sucu: 1974 (Baikalsk, yasayasa o Irkutsk)

• Me baleti koya: Daunilivaliva me tini na yabaki. Oti e daunivakasala tale ga ena veika vakalawa ena dua na kabani

• Taleitaka na iVolatabu ena gauna se gone kina. Toso na gauna e taleitaka nona itovo vinaka e dua rau cakacaka vata e vulica tiko na iVolatabu kei ira na iVakadinadina i Jiova. E mani vulica tale ga na iVolatabu. E qoroya na ka dina kei na rawarawa ni veika e vulica ena iVolatabu. Papitaiso ena 1995. Vakamautaki Viktoriya ena 2001

Ena ika16 kei na ika17 ni Julai 2019, era curuma vakaukaua na vakailesilesi e Rusia e 35 nodra vale na iVakadinadina i Jiova ena yasayasa o Nizhny Novgorod, wili tale ga kina nona vale o Verkhoturov. Nira vaqaqara na vakailesilesi ena nona vale, e kaya o Sergey: “Au sega ni lomaleqa vakalevu.” Era qai vakarerei koya na vakailesilesi nira na biuti koya e valeniveivesu ke sega ni tukuna eso na itukutuku vuni. E kaya: “E dredre sara ga na ka au sotava.” Ia ena veivuke i Jiova e dei tu ga o Sergey, e sega tale ga ni vesu o Viktoriya. b

E kaya o Sergey: “Au vulica meu kua ni lomaleqataka na veika e se bera ni yaco, baleta ena rairai sega ni yaco dina. Ni o vosota tiko na ituvaki dredre, era na rairai nanuma eso nida na sega ni vosota rawa. Ia ena gauna qori o na vakila na veivuke i Jiova ena sala o sega ni namaka.”

Me rawa ni marau tiko ga, e kauaitaka ga o Sergey nona yalodina vei Jiova kei na nona vukei ira eso tale. E kaya: “Au vinakata ga me vakalagilagi ga o Jiova. Au na masulaka tiko ga me yaco qori. Au masulaka tale ga meu vosota me rawa ni lagiti kina na yacana, me dua tale ga na ivakadinadina vinaka vei ira eso tale. O ira na tusaqati au tiko era sega sara ga ni kila na Kalou, se lailai na ka era kila me baleti koya. Au kerei Jiova gona mai vu ni lomaqu me vukei ira mera kilai koya.”

Nira sotava tiko na tacida e Rusia na veivakacacani, eda duavata kei na ka e kaya na yapositolo o Paula: “Me vakacegui kemuni tiko mada ga ena sala kece na Turaga ni veivakacegui. Me tiko mada ga kei kemuni kece na Turaga.”—2 Cesalonaika 3:16.