E tabaka e dua na ilawalawa era cakacaka ena dua na tabana ni matabose kei vuravura (United Nations Working Group on Arbitrary Detention (WGAD), e dua na ivola e 12 na tabana ni beitaki Rusia ena nona vesuki vakatawadodonu qai totogitaki o Brother Vladimir Alushkin. E tukuni vei Rusia ena ivola qori me sere o Brother Alushkin, me saumi tale ga vua na ka e vakayalia ni beci na nona dodonu.

E vesu o Brother Alushkin ena ika15 ni Julai 2018, nira curuma yani vakaukaua na nona vale e dua na ilala ovisa era vakamatavulo tu qai vakadakai. Era vaqaqara ena nona vale na ovisa e voleka ni va na aua, era taura vakaukaua na nona talevoni, iyaya vakalivaliva, nona iVolatabu, kei na so tale na ivola vakaivolatabu. Oti qori, era sa qai lai vakatarogi koya ena siteseni.

Era sa qai lai biuti koya tu ena dua na sela na ovisa me rua na siga. Oti qori sa qai vakatulewataka na Mataveilewai ni Yasana o Penza mai Pervomayskiy me vesu tale me rua na vula me wawa veilewai tu e loma. Sa qai vakatulewataka na mataveilewai me vesu tale o Brother Alushkin me 4 na vula, me waraka tale kina na nona veilewai. Ni oti e ono na vula e valeniveivesu, sa qai tokitaki me lai vesu e vale me yacova mai nikua.

E vinakata o Brother Alushkin me kila na mataveilewai ni sega nona cala me rawa ni sere, sa qai kerekere ena WGAD. Qo e dua na ilawalawa era kenadau ena kena valataki na nodra dodonu na lewenivanua, era cakacaka tiko ena UN Human Rights Council. Era dau vaqaqa na nodra kisi kece na lewenivanua era kaya nira vesu vakatawadodonu vei ira na ovisa, se o ira e totogitaki ira vakatawadodonu na mataveilewai mera vesu tu e vale, se valeniveivesu ni bera se ni oti na veilewai.

E beitaki Brother Alushkin o Rusia ni vakavuna na tiko yavavala. Sa qai vaqaqa vakamatailalai na tikina qori na WGAD, qo na ka e qai raica: “E vakaitavitaki koya o Mr. Alushkin ena itavi vakalotu, e sega sara ga ni laurai kina e dua na tiko yavavala. Eratou kila vinaka na WGAD, ni vakayagataka vinaka o Mr. Alushkin na nona dodonu ni sokalou e tiko ena article 18 ni Veidinadinati [International Covenant on Civil and Political Rights, e lewena tale tiko ga o Rusia].” Sa qai tukuni gona ena ivola “ni via vakaraitaka na WGAD ni sega ni dodonu me vesu me wawa veilewai o Mr. Alushkin, e sega tale ga ni dodonu me veilewaitaki.” Sa qai kerea na WGAD ina matanitu o Rusia me “tinia vakatotolo na veika tawadodonu e cakava tiko vei Mr. Alushkin.” E vakaraitaka tale ga ni na “tinia ga na veika tawadodonu qori ke sereki Mr. Alushkin vakatotolo.”

E raica tale ga na WGAD ni sega ni o Brother Alushkin duadua ga e sotava tiko na veika tawadodonu qori e Rusia. O koya e “dua vei ira na iwiliwili levu ni iVakadinadina i Jiova e Rusia era vesu, era totogitaki, era qai beitaki tale ga ni ra basulawa nira vakaraitaka na dodonu ni nodra sokalou”—na dodonu e taqomaka na lawa ni veimatanitu. Ni via vakaraitaka vakadodonu na WGAD na veivakacacani era sotava tiko na mataveitacini e Rusia, e kaya ni ka eratou vakatututaka e sega ni baleti Brother Alushkin ga, ia e baleti ira kece na iVakadinadina i Jiova era “sotava tiko na veika tawadodonu me vakataki Brother Alushkin.”

Se bera ni cakava e dua na ka na matanitu o Rusia ena ka e vakatututaka na WGAD. Ia eratou baci veilewaitaki Brother Alushkin tale na vakailesilesi ni matanitu o Rusia e Penza ena Okosita 2019. Sa tuvanaki tu me rogoci tale na veilewai ena ika15, ika19, kei na ika22 ni Noveba ena yabaki qo.

Eda nuitaka tu ni na muria na mataveilewai e Rusia na ka e tukuna na WGAD ena iotioti ni nona veilewai o Brother Alushkin. Me vakataki koya na daunisame, eda nuitaki Jiova vakaoti ni kaya: “Au na sega ni rere. . . . E tu e yasaqu o Jiova me dau vukei au . . . E vinaka cake na vakaruru vei Jiova.”—Same 118:6-9.