Nikua sa ikatolu ni yabaki nona vosota tiko Brother Dennis Christensen na nona vesu vakatawadodonu e Rusia. Ni tekivu mai na gauna e vesu kina ena ika25 ni Me 2017, era tarogi koya na tacida se tara vakacava na nona vakabauta na ka e sotava. E dua tu ga na ka e tukuna: “Sa qai dei ga na noqu vakabauta.”

E tomana o Brother Christensen: “Au vakadinadinataka na ka e volai ena iVolatabu ena Jemesa wase 1, tikina e 2 kei na 3: ‘Moni marau na taciqu ni oni sotava na veimataqali veivakatovolei, oni kila ni vakatubura na vosota na vakatovolei ni nomuni vakabauta ena sala qo.’”

Eda qoroya dina na dei ni nona vakabauta o Brother Christensen qai marau tiko ga, dina ni dredre vakalevu na ituvaki e sotava.

Ni oti ga nona vesu o Brother Christensen e lai wawa veilewai tu ena dua na vanua e volekata na nona vale e Oryol. Toso na gauna, sa qai vakadonui me lai sikovi koya o watina o Irina. E wawa veilewai tu o Brother Christensen me sivia ni rua na yabaki. Ena Feperueri 2019, e qai totogitaki me ono na yabaki e valeniveivesu. Oti e tolu na vula, e sega ni vakadonui na nona kerekere me rogoci tale na nona kisi. E mani tokitaki sara ena dua na valeniveivesu e rauta ni 200 na kilomita mai Oryol, e yawa sara mai vei watina o Irina.

Sa oti qo e voleka ni dua na yabaki nona rawa ni kerea o Brother Christensen me sereki koso. E sega ni vakadonui vakava na nona kerekere. Ia se yalodina tiko ga o Brother Christensen.

Sa dua dina na turaga yalomalumalumu o Brother Christensen, e kaya: “Keirau sega ni uasivi vakaveiwatini, ia keirau vulica me keirau dau vosota qai marau tiko ga ni keirau vakatovolei. Koya e bibi sara ni keirau sa qai volekati Jiova ga na neirau Kalou, e Tamai keirau tale ga.”

Keirau masu vei Jiova ena nuidei ni na tokoni ira tiko ga na mataveitacini e Rusia o Jiova, mera vosota tiko ga na veivakacacani ena marau.—Maciu 5:11, 12.