Ena ika17 ni Noveba 2020, e sega ni vakadonuya na mataveilewai ni yasana (Kamchatka Regional Court) na nodratou kerekere o Brother Konstantin Bazhenov, na watina o Snezhana, kei Sister Vera Zolotova. Sa tekivu na nodratou vakatatabutaki me rua na yabaki. Ratou na sega ni vesu ena gauna qo, ia ratou yaloqaqa qai marau tiko ga.

Ena iotioti ni gauna e rogoci kina na kisi ena ika25 ni Seviteba 2020, e doudou ni tukuna o Brother Bazhenov vua na turaganilewa ni sega ni lomaleqataka ke totogitaki. E kaya tale ga ni dua na itavi dokai me okati ena parofisai e volai ena Joni 15:20. E kaya kina o Jisu nira na vakacacani na nona tisaipeli.

E vakamacalataka tale ga ina mataveilewai o Brother Bazhenov na nona vakaroti ira nona tisaipeli o Jisu ena Maciu 28:19, 20 mera vunau. Sa qai taroga o Brother Bazhenov e dua na taro vakavure vakasama: “O cei e tu vua na dodonu me tarova se vakatabuya na ka e vakarota o Jisu?” E tomana: “Au na sega ni cegu ena vunau. . . . Au na kacivaka tiko ga na itukutuku vinaka mai na iVolatabu.”