24 SEVITEBA, 2021
RUSIA

E Vakayaloqaqataki Brother Maksim Beltikov na Nona iTuvatuva Vakayalo

SARAVA/ROGOCA

ROGO VOU | Tukuni ni Cala o Brother Maksim Beltikov

Ena ika17 ni Janueri, 2022, e kaya na mataveilewai na Pavlovskiy District Court of the Krasnodar Territory e Rusia ni cala o Brother Maksim Beltikov qai totogitaki koya me tolu na yabaki e valeniveivesu. E sa tiko qo e valeniveivesu.

Veitaravi ni gauna

29 June, 2020

E vakaroti me kua ni biuta na nona itikotiko
23 June, 2020

Tekivu veilewaitaki. E beitaki ni “vakaitavi tiko ena isoqosoqo lotu dau veivakavulici,” e okati tiko kina “na nona vakaitavi qai vakarorogo ina ivunau, era yavutaki ena ivola ni lotu”
29 Epereli, 2020

Era vaqaqara na vakailesilesi ena nona vale. Oti sa qai vakatarogi

Kena itukutuku

Maksim Beltikov

Sucu: 1980 (Baltiysk, Yasayasa o Kaliningrad)

Me baleti koya: Ni se gone, e dau taleitaka me vakatagitaka na ivakatagi ni nona vanua. E dau tuva buloko. A vakavulici koya ena iVolatabu o tavalena. E qoroya nona kila ni yaca ni Kalou o Jiova. E taleitaka na kena vakayacori na parofisai ena iVolatabu kei na ivakasala yaga e tu kina. Papitaiso me iVakadinadina i Jiova ena 2001. Vakamau kei watina o Mariya ena 2005. E tolu na luvedrau

Ka e tukuna

Sala cava e tokoni kemudou kina vakavuvale o Jiova ena gauna dredre qo?

E vakarautaka vei keitou vakavuvale o Jiova na ka kece keitou gadreva vakayago, vakayalo tale ga. E saga o watiqu kei ratou na luvequ me ratou kila na ivakarau ni lomaqu, qai vukei au meu kua ni rarawa vakalevu. E vakayaloqaqataki au e dua na tacida tagane ni wilika na Same 23. E kaya vei au: “Kua ni vakanadakui Jiova kei na nona isoqosoqo. Vakalaivi koya me dusimaki iko.”

E vukei iko vakacava na nomu ituvatuva vakayalo mo marau tikoga?

E vukei au na wili iVolatabu wasoma kei na tikovi ni soqoni meu marau tu ga qai nuidei ni o Jiova ena tokoni au tu ga. Keirau a tikova kei watiqu na soqo ni veiwasewase mai Seoul Sauca Korea ena 2018. Ena Sigatabu, e vosa vei ira na mataveitacini vosa vaKorea na tacida a vunau tiko qai kerea mera tucake na tacida era vesu ena vuku ni nodra vakabauta. Era mani tucake e vica vata na udolu na tacida tagane. Au vakasamataka lesu na noqu tukuna lo e lomaqu: ‘Ke ra sa rawa ni yalodina tu ga, au rawa talega ni yalodina tu ga.’

E vaqaqacotaka vakacava nomu veiwekani kei Jiova na ituvaki dredre o sotava qo?

E qaqaco dina noqu veiwekani kei Jiova au vakila tale ga na kena yaga ena levu tale na sala. Sa qai matata na veika au dau masulaka vua. E dina ga ni sega ni matailalai sara na ka au kerea vei Jiova ia au vakamatatataka ga na veika au vakavinavinakataka vua. Au tekivu wilika tale ga na iVolatabu ena dua tale na sala, qori na noqu saga meu wilika eso na ivakaraitaki e tautauvata kei na kequ ituvaki.

Mera tomana tiko mada ga na tacida e Rusia na nodra yalodina qai vakavinakataka tikoga nodra ituvatuva vakayalo kei na nodra veilomani vakaveitacini. Eda kila ni “Kalou dauloloma qai dauveivakacegui” ena tokoni ira tiko ga na tacida qo.—2 Korinica 13:11.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU