Ena ika4 ni Seviteba 2019, e vosa ena mataveilewai e Saratov o Sergey Igorevich Ivanenko, e dua e dau dikeva na lotu e Rusia ena vukudratou na le ono na iVakadinadina i Jiova eratou veilewaitaki. E vola o Dr. Ivanenko e rua na ivola me baleti ira na iVakadinadina i Jiova e Rusia, era doka vakalevu na ivola qori na dauvakadidike. Qo na ka e tukuna o koya ena mataveilewai:

Nodra ivakarau ni bula na iVakadinadina i Jiova kei na sokalou. “Qo e dua na ka era duatani kina na iVakadinadina i Jiova: E sega ni tukuni vei ira na ka mera cakava, se mera muria tu ga na ka e tukuna e dua. Ia era veivukei nira vakavulica eso tale me dusimaka nodra lewaeloma na iVolatabu. Qori na sala era vakatulewa ga kina vakataki ira nira vakayagataka na iVolatabu.

“Era muria na ka e tukuna na iVolatabu, me salavata kei na ka e cakava o Jisu Karisito kei ratou na nona tisaipeli ena imatai ni senitiuri G.V.

“Era qarava vata na Kalou nira vulica na iVolatabu, sauma na taro vakaivolatabu kei na nodra lagata na sere e yavutaki ena iVolatabu. E laurai nira saga vagumatua mera muria na ka e tukuna na iVolatabu.

“Era vakabauta tale ga ni dodonu me tiko na nodra ivavakoso na lotu vaKarisito. Qori na vanua era vulica kina na iVolatabu vaKirisi mera kila kina na ka e cakava o Jisu Karisito kei ratou na nona tisaipeli, ira nona imuri, kei na kena tauyavu na ivavakoso vaKarisito. . . . Era vakabauta gona na iVakadinadina i Jiova ni dodonu mera sokalou vata ena ivavakoso.

“Era vakabibitaka ni veilomani e kedra ivakatakilakila na tisaipeli i Jisu Karisito.”

Nodra cakacaka vakavunau. “Era kilai na iVakadinadina i Jiova ena nodra vakaitavi wasoma ena cakacaka vakavunau. Ni vakatauvatani kei ira na vo ni lotu, au rawa ni kaya nira kilaitani na iVakadinadina i Jiova nira gumatua ena vunau. E dodonu mera vunau kece na iVakadinadina i Jiova.

“Levu na gauna era na kaya na iVakadinadina i Jiova, ‘Qo na ka e tukuna na iVolatabu.’ Ke taleitaka o koya qori na ka era tukuna me baleta na iVolatabu, ena rawa ni dua tale ga na iVakadinadina i Jiova. Era na sega ni veivakasaurarataki.”

Era beitaki na iVakadinadina i Jiova nira vakavuna na tiko yavavala. “E kaya na matanitu o Rusia ni so na ka era tabaka na iVakadinadina i Jiova e vakavuna na tiko yavavala. Nira kaya ni o ira ga na lotu dina, kena vo kece era lasu. Qori tale ga na ka era kaya na vo ni lotu, ia era beitaki tiko ga na iVakadinadina i Jiova nira vakavuna na tiko yavavala. Era kaya na vakailesilesi ni matanitu nira kaya tiko na iVakadinadina i Jiova ni o ira duadua ga na lotu vinaka ni vakatauvatani kei ira na kena vo.

“Niu dua na dauvakadidike ena veika vakalotu, au rawa ni kaya ni cala na vakatulewa ni mataveilewai. Ke o raica vakamalua, voleka ni lotu kece era kaya nira dina, kena vo kece era lasu.

“Era vakabauta kece o ira na tiko nodra lotu ni dina ga nodra ivakarau ni sokalou, kena vo kece era lasu. Ke sega, ena tukuni nira veidabui.

“Ia era saga tale ga na iVakadinadina i Jiova mera talairawarawa ina lawa ni matanitu ke sega ni veisaqasaqa kei na lawa ni Kalou. Sa rauta meda dau rogoca na kedra italanoa na iVakadinadina i Jiova nira vakasuka na baosi e yali, era sauma tale ga na ivakacavacava. E rawa sara ga nira lawaki. Era sega ni dau vakavuna na tiko yavavala, ia era saga mera dau dina qai muria na lawa.”

iVakadinadina i Jiova kei na iVolatabu. “Dua na ka era duatani kina na iVakadinadina i Jiova oya nira vakayagataka na duidui vakadewa ni iVolatabu ena cakacaka vakaitalatala, se mera vakayagataka ena vuli. Era kila ni bibi na iVolatabu, era saga tale ga vagumatua me vakadewataki ena levu na vosa. Qori na sala era duatani kina mai na vo ni lotu nira kauaitaka na iVolatabu. Tukuni mada ga ni nodra vakadewa ni iVolatabu e vakavuna na tiko yavavala . . . De dua era nanuma o ira na vakatabuya na iVolatabu e Rusia ni o ira na iVakadinadina i Jiova era na vakayagataka ga na vakadewa qori. Ia ke kau tani mai vei ira, era na sega ni vunau, era na sega tale ga ni sokalou. E cala sara ga na vakasama qori. Era mareqeta na iVakadinadina i Jiova na ivakadewa ni iVolatabu kece.”

Veika vakalawa me baleta na nodra sokalou. “E laurai ena vakatulewa ni Mataveilewai Cecere e Rusia ni . . . levu na ivavakoso e Rusia e sega ni vakadonui vakalawa . . . E cala gona ni tukuni nira sa vakadonui kece vakalawa na iVakadinadina i Jiova.

“Au vulica vinaka na veika vakalawa me baleti ira na iVakadinadina i Jiova. E sega vakadua ni volai kina na vosa me vaka na ivakatawa, qase ni ivavakoso, se painia. Ia e volai ga kina o ratou na le tini eratou tauyavutaka. E nodratou itavi me ratou qarava na veika vakalawa sega ni veika vakalotu. Eratou sega ni vakaitutu ena ivavakoso, ratou sega tale ga ni lewa na nodra sokalou na iVakadinadina i Jiova. . . . E dua ga na ivakarau ni nodra sokalou se mani vanua cava era tu kina.

“E vakatabuya na Mataveilewai Cecere na veika vakalawa qori me baleti ira na iVakadinadina i Jiova, ia era doka na lewa e tau. Ena gauna vata qori, era sokalou tiko ga ni sega ni vakatabui ira na matanitu me baleta na lotu. Nira lewenivanua, era se tomana tiko ga nodra qaravi Kalou. Era kila ni qori na nodra dodonu. Niu dua vei ira na daudikeva na lotu, au duavata ni nodra sokalou e sega ni beca na vakatulewa ni Mataveilewai Cecere.”

iVakadinadina i Jiova kei na tauri dra. “E kaya na iVolatabu ni ‘tiko ena dra na bula’; me kua gona ni vakayagataki na dra. Na ivakaro qori e baleta tiko na kakana, ia era kila na iVakadinadina i Jiova ni rabailevu na kena ibalebale. Era vakabauta ni sega ni dodonu me vakayagataki ena dua na ka na dra, me vaka na kakana (era na sega ni kania na soseti e wakivata tu kei na dra) se mera tauri dra. Ia era vakadonuya na veiqaravi ke wasewasei vakalalai na dra. Qori e nodra vakatulewa sara ga . . . Era sega ni via tauri dra nira via mate, ia era vinakata ga mera qaravi vinaka vakavuniwai. Era vakabauta tale ga ni tauri dra ena rawa ni vakaleqa na bula, ni rawa ni dewa kina na AIDS se so tale na mate. E vinaka na veiqaravi ni sega ni vakayagataki na dra ena veisele. E laurai ena dua na vakadidike ni levu na tamata vutuniyau era digia na veisele e sega ni vakayagataki kina na dra ni totolo, era qaravi vinaka tale ga.”

iVakadinadina i Jiova kei na cau. “E rawa ni vakatulewataka e dua me kua ni cau. Kena ibalebale, e rawa ni soqoni tu e dua kei ira na iVakadinadina i Jiova, ke sega mada ga ni cau. Ena vakatau sara ga vua me cau se kua.”

E kaya tale ga o Dr. Ivanenko ena gauna ni veilewai nira dau muria na lawa na iVakadinadina i Jiova, era sega tale ga ni cakava na ka ke veisaqasaqa kei na nodra lewaeloma. Ia e sega ni rogoca na mataveilewai na ka e tukuna, ratou mani vesu kina na ono na tacida e valeniveivesu.

Se beitaki ira tiko ga na tacida na matanitu o Rusia, e vesuki ira tale ga vakatawadodonu. Era yaloqaqa na tacida qori, ra qai yalodina. Ia eda na kerea tiko ga vei Jiova me solia vei ira na rai ni se vakadonui ira tiko ga, mera vosota kina ena marau.​—Same 109:​2-4, 28.