Ena ika18 ni Feperueri 2021, a ena tauca na mataveilewai na Birobidzhan District Court of the Jewish Autonomous Region e Rusia, na lewa me baleti Sister Yuliya Kaganovich. E se bera ni kaya na dauveibeitaki na itotogi me tau vua.

Yuliya Kaganovich

• Sucu: 1966 (Mikhaylovka, Volgograd Region)

• Kena italanoa: E vuli idinia. Ni se goneyalewa e dau gole ena vanua e vulici kina na danisi, e vakoroi ena ivakatagi, e vakaitavi ena mataivakatagi, e lewena tale ga e dua na matasere. E sega ni iVakadinadina i Jiova na watina o Aleksandr. Ia e dau tokoni Yuliya, e vakadeitaka tale ga ni cala nona beitaki vakailasu

  E vakasamataka vakabibi na inaki ni bula ni oti nodra takali eso na wekana lomani. Na isaunitaro vakaivolatabu e vukei koya me lomavakacegu, qai nuidei. Papitaiso ena 1998. E vukei koya na ivakavuvuli vakaivolatabu me vinaka nodrau vakawati, nona veimaliwai kei ira eso tale, kei na nona susugi luvena o Artur e dua tale ga na iVakadinadina i Jiova

  Nona veilewai qo e vakavuna me tauvimate ga vakalevu

E kaya o Sister Yuliya Kaganovich: “Niu rogoca na tukituki e katuba au kila ni qo o ira na ovisa. Dua na ka na noqu domobula, gauna vata qori au sa vuki tukuna tu ga: ‘Jiova, vukei au. Jiova, vukei au.’”

Ena ika10 ni Okotova 2019, sa tekivu vakacacani kina na tacida yalewa yabaki 53 qo ena siti o Birobidzhan, e Rusia. Era vaqaqara na vakailesilesi ni Russian Federal Security Service (FSB) ena nona vale, kei na sivia na 20 tale nodra vale na tacida ena yasayasa qori.

E veivakaocai dina na ka e caka qo. Ia e yaloqaqa tu ga o Yuliya, kei na so tale na tacida nira sa vakarautaki ira vinakata tu.

E kaya o Yuliya: “Keimami dau tukuna wasoma ena gauna ni soqoni ni na rawa ni curumi vakaukaua neimami vale, ena vinakati gona me keimami tu vakarau.” E kuria: “Au vakadeitaka kina ni bibi meda dau vakasamataka rawa na ka meda cakava. Ya na vuna na gauna ra yaco mai kina na ovisa i noqu vale, e totolo ga na ka au vakasamataka. Sega tale niu veilecayaki se meu sega ni kila na ka meu cakava.”

Sa kilai tu ga nira na veibeitaki vakailasu na vakailesilesi e Rusia ni oti nodra vaqaqara. Ratou mani beitaki kina o Yuliya, kei na so tale nira vakaitavi ena cakacaka e vakavuna na tiko yavavala.

Ena ika3 ni Maji 2020, era kauta na vakailesilesi na kisi qo ina Birobidzhan District Court. Ia e rube tu na kisi me lima na vula ena vuku ni COVID-19. Ena ika22 ni Okotova 2020, sa laurai tale o Yuliya ina mataveilewai.

E kaya o Yuliya: “Au sega ni vinakata meu sotava na ituvaki qo. Ia au marau vakalevu ni rawa niu tokona na dodonu ni veiliutaki cecere i Jiova.

“E vakacegui au vakalevu na Aisea 41:10. Au mani tabaka, qai vakaliliga tu e noqu vale me rawa ni vakanuideitaki au nona vosa na Kalou o Jiova. Au vakila sara ga nona veivakaukauataki.”

Dina ni sotava o Yuliya na ituvaki dredre, ia e saga ena nona vinaka kece me katona na veitikinivolatabu ena vukei koya me lomavakacegu, yaloqaqa qai marau tiko ga.

E ka vakavuku gona ena gauna qo meda vakarautaka na noda vakasama, lomada kei na noda ka vakayalo ena veivakatovolei e se bera mai. Eda nuidei ni o “Jiova ena sega ni bureitaka e dua na ka vinaka vei ira na lako tiko ena yalodina.”—Same 84:11.