23 JUNE, 2021
RUSIA
E Vukei Sister Olga Ganusha Vakalevu na Masu
IROGO VOU | Sega ni Vakadonui na Nona Kerekere
Ena ika30 ni Seviteba 2021, e sega ni vakadonuya na Rostov Regional Court mai Rusia, nona kerekere o Sister Ganusha. Ena vakatatabutaki tiko ga, ia ena sega ni biu e valeniveivesu.
Ena ika13 ni Julai 2021, e vakataulewataka na Voroshilovskiy District Court of Rostov-on-Don mai Rusia, me vakatatabutaki o Sister Olga Ganusha me rua na yabaki.
Kena iTukutuku
Olga Ganusha
Sucu: 1961 (Rostov-on-Don, Yasayasa o Rostov)
Me baleti koya: Sa cegu mai na cakacaka, e dua na luvena tagane qai itubutubu le dua. E dau taleitaka na cakacaka ni liga, vakarogo ivakatagi kei na wilivola
E uqeti koya me vulica na iVolatabu na inuinui ni veivakaturi. E taleitaka tale ga na nona rawa ni bula ena vuravura parataisi, kei ira na wekana era na vakaturi mai. E papitaiso me iVakadinadina i Jiova ena 1995
iTukutuku ni Veilewai
Ena itekitekivu ni 2019, era katona lo na ivakalesilesi e Rusia na vidio nei Sister Olga Ganusha ena nona vale. Era qai vakayagataka qori mera curuma kina na nona vale ena June 2019. Era lai vakadikeva eso na ka e taukena, kei na so mada ga na ka e vakavola tu ena nona ivola. Ena ika17 ni Okosita 2020, e beitaki o Olga qai tekivu veilewaitaki ena ika4 ni Maji, 2021. E beitaki ni “basulawa” ni caka ena nona vale na lotu, kei na nona wasea vei ira eso tale na nona vakabauta. Rau a vaqaqai tale ga o Sister Lyudmila Ponomarenko, kei Sister Galina Parkova. Ia ratou na veilewaitaki yadudua.
Na rua na yabaki e vaqaqai tu kina o Sister Olga, e dau vakayaloqaqataki koya na nona masu vagumatua qai dau vakamatatataka na ka e masulaka. E kaya: “Au dau masulaka e veisiga me vakalagilagi na yaca i Jiova, me vakatakilai tale ga na yacana mera kila e levu. Au dau masulaki ira tale ga na mataveitacini era tu e valeniveivesu, kei ira era vakatabui mera biuta nodra vale. Mera yaloqaqa tiko ga ni vunautaki Jiova vei ira eso tale. Au masulaka me dei tu ga na nodra vakabauta, mera kua ni guilecava ni o Jiova ena tokoni keda tu ga nida sotava na ituvaki dredre. Au kerei Jiova meu kua ni rere, qai nuitaki koya vakatabakidua. Me vaka ga e cakava vei Jeremaia, me vakaukauataki au meu vaka e dua na duru kaukamea kei na bai kopa. Au vinakata meu vosota na veivakatovolei dredre, me vakataki ratou ga na tolu na Iperiu. Me vinaka tu ga noqu ivakaraitaki vei ira na kequ meca, me vaka ga e cakava o Jisu.”
Eda nuidei ni o Jiova ena tokoni Olga, kei ira kece na tacida era tusaqati ena ‘ligana imatau daudina.’—Aisea 41:10.
Rawa ni o Wilika Tale ga
ITUKUTUKU VOU
Vesu ena Vuku ni Nodra Vakabauta—Rusia
Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.
NA VALE NI VAKATAWA
E Dau Rogoca na Kalou Noda Masu?
E tukuna vei keda na iVolatabu ni rogoca na Kalou na noda masu ena sala e vakadonuya.