Ena ika2 ni Feperueri 2021, a ena tauca na mataveilewai ni yasana na Birobidzhan District Court e Rusia, na lewa me baleti Brother Artur Lokhvitskiy. Ena rawa ni vesu me va na yabaki.

Artur Lokhvitskiy

• Sucu: 1986 (Belgorodskoye, Jewish Autonomous Region)

• Me baleti koya: Ni se qai yabaki vitu, sa takali o nona Ta. E vakaivola ena ka ni livaliva, kenadau tale ga ena tabana ni bokobuka. Vakaicovitaki vakalevu ena nona cakacaka vakaukaua

  Ni se gone sa vakavulici koya o tinana me lomani Jiova. Ena 1998, ni se qai yabaki 11 o Artur sa papitaiso me iVakadinadina i Jiova. Ena 2018, e vakamautaki Anna. Rau dau taleitaka na gade, kei na so na ka me rau cakava e tautuba

Ena Me 2018, oti ga e tolu na vula nodrau vakamau, era vaqaqara na ovisa ena nodrau vale. Era vaqaqara e le 150 na ovisa kei na sotia ena nodra vale e 22 na tacida. A caka tale ga na vaqaqara ena vale nei Irina na tinai Artur. Ena ika31 ni Julai 2019, era beitaki Artur na Federal Security Service (FSB) e Birobidzhan, ni vakavuna na tiko yavavala. Rau beitaki tale ga ena dua tale na kisi o Anna kei Irina.

Nodrau beitaki vakailasu e dredre kina me rau sasagataka vakailavo na ka me rau bula kina. Era sogota na vakailesilesi nona akaude ni baqe o Artur. Kuria oya, e vakarerei koya nona boso ni na cegu mai na cakacaka.

E vakacacana nodrau ituvatuva ni veisiga na kena caka tiko na veivaqaqai. E kaya o Artur: “E veisau sara ga neirau ivakarau ni bula e veisiga. E dredre me keirau tuvanaka na ka me keirau cakava ena dua na macawa (se dua mada ga na siga). Era dau qiriti keirau mai [na ovisa] me keirau gole ina siteseni ena gauna ga e donu vei ira. E sega ni dei neirau ituvatuva ni ka me keirau cakava e veisiga.”

Rau vakavinavinakataka vakalevu o Artur kei Anna nodra veitokoni na mataveitacini. E kaya o Artur: “Dua na ka nodra veivakacegui vakayalo na mataveitacini, vakayago tale ga. . . . Keirau marautaka vakalevu na nodra veitokoni. Rawa tale ga ni keirau sakitaka kina na yaca i Jiova ena veilewai qo! O Jiova ena sega vakadua ni biuti ira na nona tamata!”

Dua tale ga na ka e vakayaloqaqataki rau vakalevu, ya na nodrau ituvatuva vakayalo. Ia, e sega ni rawarawa. Oti ga nodra vaqaqara na ovisa, e kaya o Artur, “E sega neirau iVolatabu kei na ivola vakaivolatabu.” A via lomaleqa vakalailai o Artur. E veinanuyaka na ka me cakava me rau vakani kina vakayalo. Ia sa qai nanuma e dua na ka dina, e kaya: “Ratou sega ni rawa ni kauta laivi vei keirau [na FSB] na masu. Keirau vakayagataka vinaka sara qori, e vukei keirau tale ga vakalevu.”

E sauma totolo o Jiova nodrau masu, e vakarautaka tale ga na kakana vakayalo me rawa ni rau cakava nodrau ituvatuva vakayalo. E kaya o Artur: “Keirau saga ena neirau vinaka kece me kua ni cala neirau sokalou vakavuvale, vakavakarau ena soqoni, kei na neirau wili iVolatabu vakavuvale. Qo e vakavolekati keirau, e vukei keirau o Jiova, e donu tale ga neirau rai.”

Dina ni rau wilika qai vulica na Vosa ni Kalou. E yaga tale ga vei rau nodrau dau vakasamataka vakatitobu na veivakalougatataki e se bera mai. E kaya o Artur: “Keirau raitayaloyalotaka kina ni keirau sa tu ena vuravura vou. Keirau via vakaitavi ena kena samaki qai vakavoutaki tale na vuravura. Qo e uqeti keirau vakalevu, e vakayaloqaqataki keirau tale ga.”

Ia ena gauna qo rau dau vakasamataka vakalevu na Iperiu 13:6, e kaya: “E dau vukei au o Jiova, au na sega ni rere. Cava ena cakava rawa vei au na tamata?” E kaya o Artur: “Dina nira na yalana na ovisa na neirau galala, soqoni, se me keirau kua ni veiraici. Ia era na sega tale ga ni kauta tani vei keirau na ka e bibi duadua, ya na neirau veiwekani kei Jiova, masu, kei na inuinui. Keirau na sega vakadua ni guilecava qori.”