Ena rawa ni tau na kena lewa o Brother Yevgeniy Spirin ena mataveilewai e Furmanovsky ena yasana o Ivanovo ena ika14 ni Julai, 2020. E kerea na dauveibeitaki me vesu o Brother Spirin me vitu na yabaki.

E yabaki 34 o Brother Spirin qai beitaki ni tuvanaka tiko na cakacaka ni soqosoqo e kaya na matanitu ni vakavuna na “tiko yavavala.” E tekivu nona kisi ena ika21 ni Janueri 2019, ni vaqaqai koya e dua na ovisa vakalecaleca ni Federal Security Service (FSB). Oti e ono na siga, era yanaraka nona vale o Brother Spirin kei watina o Natalya e vica na ovisa vakalecaleca. E vakarota kina na mataveilewai e Oktyabrsky ena yasana o Ivanovo me wawa veilewai e valeniveivesu o Brother Spirin me rua na vula, baleta ga ni dua na iVakadinadina i Jiova. E mani vesu tale tu vakadede.

E sereki mai na vanua qori ni oti e lima na vula ena ika5 ni Julai 2019, qai lai vesu tu e vale me waraka nona veilewai. Ena ika18 ni Tiseba 2019, e vakatara na mataveilewai e Oktyabrsky ena yasana o Ivanovo me biuta nona vale dina ga nira sega ni duavata kina na dauveivaqaqai. E sega tale ni dua na vakatatabu e caka vua.

Meda kerea mada ga ena nuidei vua na Tamada vakalomalagi o Jiova, me tokoni ira kece na tacida e Rusia era vakacacani ena vuku ni nodra vakabauta.—1 Pita 4:14.