Ena ika24 ni Noveba 2020, * ena vakataulewataka na mataveilewai na Petropavlovsk-Kamchatskiy City Court e Rusia, na kisi me baleti Brother Sergey Ledenyov. Ena rawa ni vesu me ono na yabaki.

Sergey Ledenyov

• Sucu: 1974 (Ossora, Kamchatka Region)

• Kena italanoa: Ratou le ono na veitacini. E taleitaka na droini kei na veitaba. E dau tarataravaki me vaka na tuva buloko kei na taile (tiles). Dau nanuma tu ni sa rui ivola makawa na iVolatabu, e sega ni salavata tale ga kei na ka vakasaenisi. Ia e veisau nona rai ena gauna e vulica kina na iVolatabu kei ira na iVakadinadina i Jiova. E vakamautaki Anna ena 2017. E kaya o Anna nona muria o Sergey na ivakavuvuli vakaivolatabu, e dua kina na tagane vakawati yalololoma qai dauveinanumi

Ena ika2 ni Tiseba 2018, era curuma vakaukaua na ovisa era vakamatavulo ra qai vakaiyaragi tu na nona vale o Brother Ledenyov, e Petropavlovsk-Kamchatskiy. E vesu qai beitaki ni beca na lawa ena Article 282.2 of the Russian Criminal Code. Ena tekivu veilewaitaki ena ika28 ni Noveba 2019.

Ena ika12 ni Tiseba 2019, e tukuna na mataveilewai na Petropavlovsk-Kamchatskiy City Court, me ratou dikeva tale na dauveibeitaki na nona kisi o Brother Ledenyov. E dau yaco qori ni raica na mataveilewai ni lailai nona ivakadinadina o koya e beitaki ni cala. Ia ena ika4 ni Feperueri 2020, e veisautaka na lewa na mataveilewai e cake qai tomana tale na veilewai. Oti qori e rogoci tale na kisi, ratou mani vakatarogi Anna na watina kei na dua tale na tacida yalewa, na loya ratou qai vakasaurarataki rau me rau beitaki Brother Ledenyov vakailasu. Ia rau sega ni cakava qori o rau na tacida yalewa.

Ratou sega ni taura rawa na wekai Brother Ledenyov era sega ni tiko ena dina, na vuna e vakacacani kina ena vuku ni nona vakabauta.

Meda nanumi rau o Brother kei Sister Ledenyov ena masu, ni rau waraka tiko me tau na lewa. Eda nuidei ni na tiko vata kei rau na yalo tabu i Jiova.—1 Pita 4:14.