Ena ika16 ni Tiseba 2020, * ena tauca na mataveilewai na Leninskiy District Court of Novosibirsk mai Rusia, na lewa me baleti Brother Yuriy Savelyev. Ratou vinakata na dauveibeitaki me walu na yabaki e valeniveivesu. Qori e dua na itotogi warumisa me tau me tekivu mai na gauna e vakatabuya kina na Mataveilewai Cecere ena 2017 nodra cakacaka na tacida e Rusia.

Yuriy Savelyev

• Sucu: 1954 (Krokhalyovka, ena Novosibirsk Region)

• Kena italanoa: Ni se gone lailai sa mate o tinana qai susugi koya o ganena. E cakacaka vakapalama. Tekivu taleitaka na lotu ena gauna e mate kina o watina. E vakadeitaka ni tu ena iVolatabu na isau ni nona vakatataro. E papitaiso me iVakadinadina i Jiova ena 1996

Ena ika8 ni Noveba 2018, era curuma vakaukaua na ovisa nona vale kei na nodra vale tale ga e ciwa na tacida ena Novosibirsk Region. E vesu o Yuriy qai wawa veilewai tu.

E beitaki o Yuriy ni tuvanaka tiko ena siti na nodra cakacaka na iVakadinadina i Jiova. E kerekere vakavica ina mataveilewai, ia e sega ni vakadonui qai vesu tu vakadede. Sa sivia qo e rua na yabaki nona vesu tiko e valeniveivesu. Tekivu mai na 2017 ena lewa ni Mataveilewai Cecere e Rusia, e balavu duadua nodrau vesu o Brother Dennis Christensen kei Brother Sergey Klimov ni vakatauvatani vei Brother Savelyev.

Ena ika9 ni Tiseba 2020, e cavuta o Yuriy na iotioti ni nona vosa ina mataveilewai. E yaloqaqa ni kaya vua na turaganilewa: “Au sega ni beitaki niu dua na basulawa, ia au beitaki ga niu muria tiko nodra ivakavuvuli na iVakadinadina i Jiova.

“Ena 67 na yabaki ni noqu bula e sega ni dua na kequ na meca, au sega tale ga ni beitaki ena basulawa. Au vakadeitaka meu tawaveitovaki tiko ga. Kena ibalebale, au sega ni tokona na ivalavala voravora se mani vakaraitaki ena vosa, vakasama se na ka e caka.

“Noqu talairawarawa vua na Kalou e uqeti au meu dokai ira na tamata kece se mani vanua cava era cavutu mai kina, kedra irogorogo se lotu era lewena.

“E uqeti keda tale ga na Vosa ni Kalou meda dokai ira na vakailesilesi. E kaya na Roma 13:1-3: ‘Mera talairawarawa na tamata kece vei ira na iliuliu cecere, ni sega ni dua e veiliutaki rawa ke sega ni vakatara na Kalou. O ira kece na veiliutaki qo era veiliutaki tiko ga ena iyalayala e dui vakatara vei ira na Kalou. O koya gona, o koya e saqati ira na veiliutaki e saqata na ituvatuva ni Kalou.’

“Au sega gona ni via saqati ira na vakailesilesi, niu sega ni via saqata na Kalou. Ena tini ga ena rusa ke da saqata na Kalou. Ena vukudra ga na iVakadinadina i Jiova au mai kila kina na Kalou dina, kei na luvena o Jisu Karisito. Au vakavinavinakataki ira ni rawa niu mai vakabauta na vakasakiti ni iVolatabu. E yaga vakalevu ena noda bula.”

E vakayaloqaqataki keda na dei ni nona vakabauta o Yuriy, na nona mamarau tale ga e vakaraitaka ni vakacegui koya tiko ga o Jiova.—Aisea 26:3.