Levu na tacida tagane era vesu ena vuku ni nodra vakabauta, era vakawati ra vakaluveni tale ga. Dina ni dredre na ituvaki era sotava tu e valeniveivesu, ia e dredre cake sara na veika era sotava na watidra kei na luvedra. Dua ya, nira duitutu ra qai vosota tale ga e levu na ituvaki. Ratou mani vola e dua na ivola vei ira na vakailesilesi e Rusia e tini na tacida yalewa e vesu tu na watidratou. Ratou vola: “Keitou kerea vakalevu na nomuni veivuke. Dua na ka neitou nanumi ratou na lewe ni neitou vuvale ratou vesu tiko. Ratou beitaki ni ratou basulawa ni keitou a wilika vata vakavuvale, kei ira na neitou itokani na iVolatabu, keitou masu vata tale ga.”

E le vica vei ira na tacida yalewa ratou vakamacalataka na ituvaki dredre ratou sotava, kei na nona vukei ratou tiko o Jiova me ratou vosota.

E vakadredretaki vei ira e levu na tacida yalewa mera qiriti watidra e valeniveivesu. Kuria ya, e taura e dua na gauna balavu me soli nodra ivola vei watidra, eso na gauna e sega sara ga ni soli.

E vesu tu o Feliks Makhammadiyev na wati Sister Yevgeniya Lagunova me sivia e rua na yabaki. Eso na gauna e sega ni ciqoma na nona ivola e valeniveivesu. E dau lomaleqataki koya vakalevu o Sister Yevgeniya ni sega ni kila se vacava tu na kena ituvaki. E dau vakasamataka tale ga ke sa yalolailai tu ni sega ni ciqoma na nona ivola.

Levu vei ira na tacida yalewa era dau gole vakabalavu mera sikovi watidra. (Raica na kato “Travel Distances for Wives to Visit Their Husbands.”) Kena ivakaraitaki, e kaya o Sister Yevgeniya: “Au draiva me sivia e 800  na kilomita meu sikovi watiqu.” Rauta ni va na siga nona ilakolako qori, qai lesu tale i nodratou i vale. Eso tale na tacida yalewa era gole me rauta ni 1,000  na kilomita mera sikovi watidra. Nira yaco yani era na wawa tale tu vakadede e tuba.

O Sister Irina Christensen na wati Brother Dennis. E imatai ni iVakadinadina i Jiova me vesu e Rusia ni tekivu vakatatabutaki na noda cakacaka ena 2017. E dau gole o Sister Irina Christensen me rauta ni 200 na kilomita me sikovi watina e Lgov. E kaya: “Sega ni rawarawa noqu lai veisiko. Au dau oca qai yalolailai. Au na biubiu ena veimama ni tolu ena mataka lailai, meu rawa ni yaco e valeniveivesu ena 8 na kaloko meu solia kina na ivola me baleta na noqu veisiko. Oti au na wawa tu ena motoka me yacova na tinikadua na kaloko me dola kina veisiko.” Ni tarogi se vosota vakacava, e kaya o Irina: “Au dau masu wasoma vei Jiova. Au dau kerea me tokoni au kei ira na mataveitacini era tiko volekati au, ira na vesu tu kei ira kece na taciqu e veiyasa i vuravura.”

O Gennadiy na wati Sister Nadezhda German sa vesu tu mai me sivia e rua na yabaki. Dua na ka nona yalolailai o Sister Nadezhda German me vakai ira ga na vo ni tacida yalewa e vesu tu na watidra. Ia e kaya: “Era dau tokoni au vakalevu na lewe ni noqu ivavakoso. E laurai votu na nodra veikauaitaki, kei na nodra lomani keirau vakaveiwatini.”

E kaya o Sister Yuliya Miretskaya, e vesu tale ga o watina o Brother Aleksey: “Era dau mai veivuke e vale na mataveitacini. E veivakacegui nida kila ni tiko o ira na tacida eda rawa ni nuitaka.”

O Sister Tatyana Budenchuk e susugi ratou tiko na luvena. E vesu tu o watina o Brother Aleksey me tekivu mai na Seviteba 2019. E kaya: “Ratou dau saga na gone me ratou vakasamataka na veika e vakarautaka vei keitou o Jiova kei na nona tokoni keitou tiko. Ratou kila ni lekaleka ga na veika dredre keitou sotava. Qo e gauna vinaka tale ga me keitou vakaraitaka kina na neitou vakabauta, kei na neitou yalodina vei Jiova.”

O Brother Sergey Filatov na wati Sister Natalya Filatova, e vesu tu mai ena Maji 2020. E qai susugi ratou duadua tiko na va na luvedrau o Sister Natalya Filatovao. E kaya: “Au dau raica vei ratou na gone ni ratou dau lomaleqataki tamadratou vakalevu. Ratou dau masulaka qori vei Jiova. E dau volavola na luvequ yalewa gone duadua vei tamana. E kaya vua me kua ni lomaleqataki keitou. Ia e waraka tu na gauna ena sereki mai kina me keitou mai duavata tale vakavuvale.”

Ratou saga vakavuvale me ratou muria na ivakavuvuli vakaivolatabu me ratou bula rawarawa ga. E kaya o Natalya: “Keitou vulica me keitou lomavakacegu ena ka ga sa tu rawa. E veirauti vinaka tale ga na ilavo ena saumi ni bili, kei na ka me keitou bula kina ena veisiga.”

Dina ni ratou sotava na tacida yalewa qo na ituvaki dredre, ia ratou saga me qaqaco tiko ga nodratou vakabauta qai dei ena nodratou ituvatuva vakayalo. E kaya o Yuliya: “Au dau saga meu wilika na noda ivola, qai sarava na noda vidio vou kece. Na veika au vulica kina e sega ni baleti au ga, ia au dau wasea tale ga vei Aleksey. Ni keirau veivosaki, au na saga meu nanuma kece mai na ka au vulica meu rawa ni vakamacalataka vua.” E kaya o Nadezhda: “Se mani leqa cava eda sotava, eda na rawa ni walia ena veivuke i Jiova. Au dau vakila tu ga na nona volekati au o Jiova. Au vaka ga e dua na goneyalewa lailai e mokoti au tu na Tamaqu e Kaukaua Duadua. E dau vakayaloqaqataki au tale ga na noqu vukei ira eso tale.”

E kaya o Natalya: “Au dau vakasamataka na ka e tukuna e dua tacida yalewa, ‘Eda dau vinakata kece na tamata i Jiova meda dau vakayaloqaqataki. E sega tale ga ni dua vei keda ena sega ni rawata me vakayaloqaqataki ira eso tale.’ E vakamarautaki au vakalevu au noqu vakacegui ira, qai vakayaloqaqataki ira eso tale. Au sega ni dau via vakalomalomani au. Au sega tale ga ni vinakataka me vayalolailaitaki au nona vesu tu o watiqu. Au sega ni via vakalaiva me vakayalolailaitaki au o Setani!”

Eda vuli dina ena nodra ivakaraitaki ni vakabauta na tacida e vesu tu nodra lewenivuvale e Rusia, kei na so tale na vanua. Eda kila ni mareqeti ira vakalevu o Jiova nira ‘ka talei e matana.’—Aisea 43:4a.