Ena yakavi ni ika10 ni Feperueri 2020, era vakalolomataki Brother Vadim Kutsenko e dua na iVakadinadina i Jiova eso na ovisa e Chita, e Rusia. Eratou mokulaki koya vakavica na ovisa, ratou kidomoki koya, eratou biuta tale ga i ketena kei na yavana na misini vakalivaliva. Ni ratou cakava tiko qori, ratou sa qai vakasaurarataki Brother Kutsenko me solia mai na kedra ivolatukutuku na mataveitacini.

Ena mataka ni siga ya, era vaqaqara na vakailesilesi ni Federal Security Service (FSB), ena nodra vale e voleka ni 40 na iVakadinadina i Jiova e Chita, wili kina na vale nei Brother Kutsenko. Eratou qai vesuki koya ena 11 na kaloko ena bogi ena vale nei nona Nei. Eratou vesuka ruarua na ligana, ubia na uluna, eratou sa qai vakalolomataki koya ena dua na loma ni veikau. Ni caka vua na itovo vakaloloma qori, e sega vakadua ni tukuna o Brother Kutsenko na kedra itukutuku na mataveitacini. Ni ratou kila na ovisa ni sa sega ni rawa na lomadratou, ratou sa qai lai vaqaqai koya ena dua na rumu.

Ni oti na vaqaqara qori e Chita, sa qai vesu o Brother Kutsenko kei na tolu tale na tacida o Sergey Kirilyuk, Pavel Mamalimov, kei Vladimir Yermolayev. Ni oti e rua na siga, e lewa na Mataveilewai ni Yasana o Ingodskiy me ratou vesu vakawawa o Brother Kutsenko, Kirilyuk, kei Mamalimov me tolu na siga. Sa qai sereki Brother Yermolayev na mataveilewai, me lai vesu ena nona vale.

Ena ika15 ni Feperueri, eratou sa sere o Brother Vadim Kutsenko kei na rua na tacida tagane ni sega ni raica na dauveivaqaqai e dua na ivakadinadina me ratou beitaki kina. E sereki ratou na dauveivaqaqai, e sega tale ni qai rogoca na lewa ni mataveilewai, e sega tale ga ni biuta e dua na vakatatabu vei ratou.

Meda masulaki Brother Kutsenko mada ga kei ira na vo ni tacida e Rusia mera ‘yaloqaqa qai kaukaua.’ Meda nuitaki Jiova ni na tokoni ira tiko ga ena gauna dredre qori.—Josua 1:7, 9.