Oti e ciwa na siga nona beitaki vakatawadodonu o Dennis Christensen ena mataveilewai e Rusia, ratou vakatotogani e rauta ni le vitu na iVakadinadina i Jiova. Era vakararawataki ratou na vakailesilesi ena siti o Surgut, e Siberia, ena misini vakalivaliva, ratou kidomoki, qai mokulaki. Era cakava qori nira via kila na vanua ni soqoni kei na kedra itukutuku eso tale na tacida.

A tekivu yaco qori ena mataka caca ena ika15 ni Feperueri, 2019, ena nodra curuma vakailoa nodra vale na tacida na vakailesilesi e Surgut. Oti era vesuka eso na tacida, qai kauti ira ena tabana ni veivaqaqai mera lai vakatarogi. Ia era sega ni tukuna na veika me baleti ira eso tale na tacida. E dua na loya a tiko ena gauna ratou vakatarogi kina. Ia ni sa biubiu, qo na ka e qai caka vei ratou na tacida. Era ubia na vakailesilesi na taga e uludratou qai dregati ena tepi, vesu na ligadratou e dakudratou, ratou qai mokulaki. E luvati nodratou isulu, ratou sui tale ga ena wai, oti ratou qai lauvana ena dua na mataqali dakai livaliva (stun gun) me katia na yagodratou. Rauta ni rua na aua na kena vakayacori tiko na veivakararawataki vakadomobula qori.

Ratou se vesu tiko e le tolu na tacida. Ia ratou sa sere na kena vo ratou sa lai qaravi vakavuniwai. Sa kerei tale ga vei ratou na vakailesilesi e cake ni matanitu me dikevi nodratou kisi.

Oti nodra curuma vakailoa na vale na vakailesilesi e Rusia, era beitaki ira na le 19 na tacida nira cakava tiko na cakacaka e “vakavuna na tiko yavavala” era “tauyavutaka tale ga na kena isoqosoqo.”

Ia e vakamatatataki tu ena Lawa ni Basulawa ni Rusia, nira sa basulawa sara tiko ga na vakailesilesi ena veivakatotogani qori. Kuria ya, e dodonu me doka na Russian Federation na lawa era tauyavutaka na isoqosoqo e vuravura mera kua ni vakatotogani na lewena. Eda na vakayagataka gona na dodonu vakalawa kece eda kila me saqati kina na veivakacacani qori.

Eda kila ni raica tu o Jiova nodra vakararawataki qori na tacida e Rusia, ena yavala tale ga me ‘vukei ira qai vakabulai ira.’—Same 70:5.