Ena ika23 ni Maji 2020, era yanaraka na vakailesilesi ni Federal Security Services (FSB) na vale nei Brother Igor Avramenko e Khabarovsk, e Rusia. E yaco qori ni oti e ono na siga nona takali ni tauvi mateniuto. Ratou vakaraitaka vei Sister Avramenko na FSB, na nodratou ivolatara ni vaqaqara, e volai tu kina na yaca i watina. Ia ratou kauta na nona kompiuta, na itaba kei na so tale na iyaya lalai.

Ena siga ya ratou gole na ovisa ena nona vanua ni cakacaka o Sister Avramenko, ratou qai kauti koya i vale. Sa waraki ratou tu mai vale na nodratou iliuliu na dauveivaqaqai o Stanislav Grebenkin, ratou vakaraitaka tale ga na nodratou ivolatara ni vaqaqara. E kaya sara vua o Sister Avramenko ni sa takali o watina. E kaya o Mr. Grebenkin ni sa kila tiko qori, ia eratou via vaqaqara ga ni sa vakadonui tu ni bera ni takali o Brother Avramenko.

E kaya o Mr. Grebenkin ni ratou na sega ni vaqaqara sara vakalevu, ia e caka ga me “sogo kina na kisi, me maroroi tale ga na kena itukutuku vei iratou na [FSB].” Ia ratou qai yanaraka na lomanivale.

Eratou beitaki e 10 na tacida e Khabarovsk ena basulawa. Dua na ka nodra sasaga na vakailesilesi mera vakaluluqataka nodra vakabauta na tacida e Rusia, ia eda kila nira na ‘kaukaua qai tiko vakacegu, ra qai vakanuinui tiko’ vua na Tamada dauloloma o Jiova.—Aisea 30:15.