MAJI 27, 2024 | IROGO VOU: ME 13, 2024
RUSIA

IROGO VOU—⁠BEITAKI NI RATOU CALA | Nuidei, Vakavakarau kei na Rai Donu

SARAVA/ROGOCA

Ena ika13 ni Me 2024, e kaya na mataveilewai na Leninskiy District Court of Barnaul in the Altai Territory mai Rusia, ni cala o Brother Yuriy Kolotinskiy, Brother Mikhail Reshetnikov, kei Brother Anatoliy Sarychev. Ratou vakatatabutaki me rua na yabaki, tolu na vula. Ratou na sega ni biu e valeniveivesu ena gauna qo.

Kedratou iTukutuku

Yuriy Kolotinskiy

Sucu: 1955 (Moldova)

Me baleti koya: Cakacaka ena dua na kabani e dau vakayagataki kina na misini lelevu

Rau vakamau kei Nataliya ena 1977

E dau lomatarotarotaka na vuna e levu kina na rarawa. Sa qai saumi vakamatata nona taro ni vulica na iVolatabu kei ira na iVakadinadina i Jiova. Rau papitaiso vakaveiwatini ena 1995

Ka e Tukuna

Na ivakaraitaki cava ena iVolatabu e vukei iko mo nuitaka na veitokoni i Jiova?

Au dau vakasamataka na nodra biubiu mai Ijipita na Isireli. O Jiova e liutaki ira, qai taqomaki ira ena gauna kece era tiko kina ena vanualiwa. Au kila ni qori tale ga na ka e cakava tiko vei au o Jiova. Gauna kece au kacivi kina ena mataveilewai, e vaka ga e liu tiko vei au o Jiova. Au vakila na nona veitokoni, au vakadeitaka kina ni lomani au. E solia tale ga vei au na kaukaua meu vosota qai yalodina tiko ga se mani cava e yaco. Sa qai kaukaua cake ga na noqu vakabauta, au kila tale ga ni donu na noqu vakatulewa. Au tu vakarau gona meu tutaka na yaca i Jiova ena sala cava ga.

Mikhail Reshetnikov

Sucu: 1949 (Maksiner, Yasayasa o Kirov)

Me baleti koya: E sivia ni 50 na yabaki nona draiva tu ni lori lelevu kei na basi

A vakawati qai dua na luvedrau tagane kei na yalewa, qai mate o watina ena kenisa. Oti rau qai vakamau kei Antonina ena 2021

E levu na nona taro me baleta na iVolatabu, ia e sega ni saumi qori ena lotu e lewena. E marautaka ni sa mai kila na dina ena nona vulica na iVolatabu kei ira na iVakadinadina i Jiova. Papitaiso ena 2000

Ka e Tukuna

E yaga vakacava na nomu vakarautaki iko rawa ni bera na veitusaqati?

Nira sa tekivu vesu qai biu e valeniveivesu na tacida, au kerea vei Jiova me solia vei au na vuku kei na lewa matau meu vakarautaki au rawa. Na noqu vakadinadinataka na veivuke i Jiova, au vakadeitaka kina ni dau sauma o koya na masu ena kena gauna donu. Au nuidei ni na sega vakadua ni biuti au. Au sega gona ni rerevaka na vakatulewa ni mataveilewai me baleta na noqu kisi. Na veivuke ga i Jiova ena vukei au yalodina tiko ga.

Anatoliy Sarychev

Sucu: 1949 (Karpovo, Altai Territory)

Me baleti koya: E daudroini (graphic designer), qo sa cegu mai na nona cakacaka

Rau vakamau kei Nadezhda ena 1990. E dua na luvedrau tagane

E sotavi ira na iVakadinadina i Jiova ni caka oti vua e dua na veisele levu. E marautaka ni sa mai kila na vosa ni yalayala i Jiova ni na vakaotia na itovo voravora kei na rarawa. Papitaiso o Nadezhda ena 2001, qai papitaiso o Anatoliy ena 2002

Ka e Tukuna

Na cava e vukei iko me donu tiko ga nomu rai?

Au vakasamataka na ka e tukuna na 1 Pita 3:14: “Ke oni vakararawataki mada ga ena vuku ni ka dodonu, oni na marau ga.” O ira na Farisi era tusaqati ratou na yapositolo baleta ni ratou vunau tiko ga. Ia ratou vosota na nodratou vakamaduataki ena vuku ni yaca i Jisu, ratou qai okata qori me dua na ka marautaki. Au via muria na nodratou ivakaraitaki na yapositolo. Au sega gona ni yalolailai ena vuku ni veitusaqati. Ia au lomavakacegu ga niu muria na nodra ivakaraitaki na lotu vaKarisito taumada, kei Jisu Karisito.

Eda vakavinavinakataki ratou na tacida qo ena nodratou i vakaraitaki ni vakabauta, kei na nodratou vakararavi vei Jiova. Eda vakadeitaka ni na yaga vakalevu vei ratou na nona loloma o Jiova, kei na nona yalodina.—⁠Same 25:10.

Veitaravi ni Gauna

Me 25, 2021

Tekivu vaqaqai o Mikhail
Me 27, 2021

Caka na vaqaqara ena vale nei Mikhail, rau qai vakatarogi kei Antonina. Vakatabui o Mikhail me gole ena dua tale na vanua
Okotova 6, 2022

Tekivu vaqaqai o Anatoliy kei Yuriy qai biu vata na nodrau kisi kei Mikhail
Okotova 7, 2022

Vakatabui me rau gole ena dua tale na vanua o Anatoliy kei Yuriy
Janueri 19, 2023

Ratou tekivu veilewaitaki

Raica Tale Ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU