JANUERI 24, 2022 | IROGO VOU: TISEBA 29, 2023
RUSIA

IROGO VOU—⁠BEITAKI NI RAU CALA NA TACIDA | Rau Vakacacani ia Rau Vakalougatataki Vakalevu

SARAVA/ROGOCA

Ena ika29 ni Tiseba 2023, e kaya na mataveilewai na Norilsk City Court of the Krasnoyarsk Territory mai Rusia, ni cala o Brother Aleksandr Polozov kei Brother Stepan Shevelev. Rau vakatatabutaki me ono na yabaki. Rau na sega ni biu e valeniveivesu ena gauna qo.

Veitaravi ni Gauna

Okotova 20, 2019

Era gole na vakailesilesi ena dua na vanua ni keba ena siti o Norilsk, ra qai vesuki ira e sivia ni le 50 na tacida
Okotova 26, 2019

Vesu vakawawa o Aleksandr
Janueri 21, 2020

Sere o Aleksandr ni oti e tolu na vula nona vesu tu
Feperueri 19, 2020

Beitaki o Aleksandr ni vakavuna na tikoyavavala, qai sogo nona akaude ni baqe
Me 6, 2021

Okati o Stepan ena kisi ni veilewai nei Aleksandr. Era beitaki koya na vakailesilesi ni daubasulawa ena nona masu, qai vunau tiko

Kedrau iTukutuku

Aleksandr Polozov

Sucu: 1970 (Torzhok, Yasayasa o Tver)

Me baleti koya: Ni se gone e taleitaka na qito hockey, kei na qalo. Cakacaka ena tabana ni veivueti. Rau vakamau kei Svetlana ena 1998. Rau taleitaka na vodo basikeli kei na gade

Vulica na iVolatabu kei ira na iVakadinadina i Jiova ena veiyabaki ni1990. Papitaiso sara ena 1995

Ka e Tukuna

E vukei iko vakacava o Jiova ena gauna o vesu tu kina?

Oti na imatai ni noqu vakatarogi, au vesu sara. ... E taroga o koya keirau vesu vata na vuna au vesu kina. Au kaya vua niu beitaki niu daubasulawa ena vuku ni noqu vakabauta. ... E kaya vei au: “Rai mada i ruku ni teveli.” Au raica sara e rua na iVolatabu. Au sega sara ga ni vakabauta na ka au raica! ... Na imatai ga ni siga au vesu kina sa dua na noqu iVolatabu. Au vakavinavinakataki Jiova ni tokoni au ena sala au sega ni namaka.

E yaga vakacava vei iko nodra veivuke na mataveitacini?

E vakayaloqaqataki au vakalevu na nodra veitokoni kei na nodra veivuke. Kena ivakaraitaki, ena dua na mataka batabata era wawa tu ra qai vakasausau niu vakavodoki ina lori meu lai veilewai. Era cakava tale qori ena gauna au sa kau lesu kina ena ono na kaloko ena yakavi meu lai vesu. E tarai au sara ga na ka era cakava qori e ivakadinadina levu tale ga.

Stepan Shevelev

Sucu: 1982 (Maslyanino, Yasayasa o Novosibirsk)

Me baleti koya: Cakacaka ena tabana ni livaliva (cable splicer). Rau vakamau kei Oksana ena 2013. Rau taleitaka na wiliwili kei na gade

Rau vulica na iVolatabu o tinana kei ganena ena 1996, ia rau sega ni papitaiso. E mani vulica na iVolatabu o Stepan, qai dua na ka nona qoroya na ivakavuvuli vakaivolatabu. E uqeti koya tale ga na sala e veisautaka kina na nodra bula e levu na iVolatabu. Papitaiso sara ena 2001

Ka e Tukuna

E vukei kemudrau vakacava vakaveiwatini na nomudrau ituvatuva vakayalo?

Keirau dau marautaka neirau sokalou vakavuvale. Keirau biuta ena neirau ituvatuva e dua na siga me keirau cakava kina qori, qai vica vata na yabaki neirau cakava tiko mai. Keirau sega tale ga ni vakalaiva e dua na ka me tarova na neirau sokalou vakavuvale. Qori e vakanuideitaki au ni na yalodina tiko ga o watiqu. Au dau saga tale ga meu marautaka na noqu wili iVolatabu e veisiga. Kena ivakaraitaki, au wilika taucoko na iVolatabu ena dua na yabaki. Oti au wilika na veitaravi ni ka e yaco, au qai biuti ira vata vakaiwasewase. Qori e vukei au me bulabula noqu wiliwili, e levu tale ga na ka au vulica.

E veisau vakacava nomu rai me baleti ira na veivakacacani tiko?

E vukei [au] o Jiova me donu noqu rai me [baleti ira]. Keirau vakasamataka kei watiqu ni o ira na veivakacacani tiko qo, era cakava tiko ga na cakacaka e lesi vei ira. Era sotava tu na ituvaki dredre, era vinakata tale ga mera rogoca na inuinui totoka eda vunautaka tiko.

Dina ni rau vakacacani na tacida qo, ia eda nuidei ni o Jiova ena tokona na nodrau sasaga me rau yalodina tiko ga.—Dauveilewai 8:4.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU