MAJI 19, 2024 | IROGO VOU: EPERELI 23, 2024
RUSIA

IROGO VOU—⁠BEITAKI NI RAU CALA | ‘O Jiova ga e Vakacegui Au’

SARAVA/ROGOCA

Ena ika22 ni Epereli 2024, e kaya na mataveilewai na Petropavlovsk-Kamchatskiy City Court of the Kamchatka Territory mai Rusia, ni cala o Brother Sergey Chechulin kei watina o Sister Yelena Chechulina. Rau na vakatatabutaki me rua na yabaki. Rau na sega ni biu e valeniveivesu ena gauna qo.

Kedrau iTukutuku

Sergey Chechulin

Sucu: 1968 (Tymlat, Yasayasa o Kamchatka)

Me baleti koya: E susu ena vanua era qaravi kina na luveniyali. E cakacaka ena dua na kabani e cakava na misini e vakatakata se vakabatabatataka na lomanivale

E sureti koya ena soqoni ni iVakadinadina i Jiova e dua na nona itokani sa vulica tiko na iVolatabu. E saumi sara ga nona lomatarotaro o Sergey. Papitaiso ena 1995

Rau vakamau kei Yelena ena 2000. E dua na luvedrau tagane

Ka e Tukuna

Vakacava bau dua na tikinivolatabu e yaga vakalevu vei kemudrau vakaveiwatini?

E vakatabui me keirau gole ena dua tale na vanua, e vesu neirau lori, e sogo tale ga neirau akaude ni baqe. Ia qo sa qai vakaibalebale vei keirau na Same 55:22: “Biuta vei Jiova na nomu icolacola bibi, ena tokoni iko o koya. Ena sega vakadua ni laiva me bale na yalododonu.” E yalataka o Jiova ni na vakaukauataki keda. Na ituvaki kece keirau sotava, keirau vakadinadinataka tu ga na nona veivuke. Qori e uqeti keirau me keirau nuitaki koya vakalevu, kei ira na mataveitacini. Keirau vakadeitaka gona me keirau na qaravi koya tiko ga.

Yelena Chechulina

Sucu: 1978 (Petropavlovsk-Kamchatskiy)

Me baleti koya: E nasi

Tekivu vulica o tinana na iVolatabu kei ira na iVakadinadina i Jiova. Qori e vukei koya me vakadeitaka nona ka vakayalo, e mani kerea me vulica na iVolatabu. Papitaiso ena 2000

Rau vakamau kei Sergey ena 2000

Ka e Tukuna

Cava o vulica me baleti Jiova ena ituvaki o sotava qo?

Au vulica ni veisau na ituvaki au sotava, e vakatitobutaka sara ga noqu kila na iVolatabu. Kena ivakaraitaki, na noqu vakacacani qo sa qai matata kina vei au na ka e vola o Paula ena Roma 8:38, 39: “E dei tu na lomaqu ni na sega ni rawata na mate, na bula, na agilosi, na veimatanitu, na veika era tu nikua se veika ena yaco mai, na kaukaua cava ga, se dua na ka mai cake se ka e ra, se dua tale na kabuli, me tawasei keda mai na loloma ni Kalou e mai vakaraitaka o Karisito Jisu na noda Turaga.” Ke via vakaraitaka o Jiova na nona lomani au, ena sega ni dua na ka ena tarovi koya. Ena cakava tale ga ena sala au vakadeitaka kina ni o koya Duadua ga ena vakacegui au. O Jiova ena sega ni galu tu ga, se vunitaka nona lomani ira nona dauveiqaravi. Na veika e yaco qo e vukei au meu vosota na ituvaki cava ga au na rawa ni sotava ena gauna se bera mai.

Me vakataki Sergey kei Yelena, eda vakamareqeta na isolisoli talei ni Vosa ni Kalou. E vakaukauataki keda qai vakavukui keda me rawa nida yalodina tiko ga ni sotava na veika dredre.—Same 19:7.

Veitaravi ni Gauna

Seviteba 25, 2022

Tekivu na veivaqaqai
Okotova 17, 2022

Caka na vaqaqara e nodrau vale
Seviteba 6, 2023

Vakatabui o Sergey me gole ina dua tale na vanua
Seviteba 7, 2023

Vakatabui o Yelena me gole ina dua tale na vanua
Tiseba 26, 2023

Tekivu veilewaitaki

Raica Tale Ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU