TISEBA 27, 2023 | IROGO VOU: MAJI 6, 2024
RUSIA

IROGO VOU—⁠VESU NA TACIDA | Donu Tiko ga na Nodratou Rai

SARAVA/ROGOCA

Ena ika5 ni Maji 2024, e kaya na mataveilewai na Oktyabrskiy District Court of Irkutsk mai Rusia, ni cala o Brother Nikolay Martynov, Brother Sergey Kosteyev, Brother Yaroslav Kalin, Brother Mikhail Moysh, Brother Igor Popov, Brother Denis Sarazhakov, Brother Aleksey Solnechniy, Brother Andrey Tolmachev, kei Brother Sergey Vasiliyev. Ratou na vesu me vitu na yabaki o Nikolay, Sergey Kosteyev, Yaroslav, Mikhail, Aleksey, kei Andrey. Rau vesu me ono na yabaki, va na vula o Igor kei Denis. O Sergey Vasiliyev e vesu me tolu na yabaki, ni tau oti ga na lewa sa kau me lai vesu. Ratou na vesu tiko vakawawa na vo ni tacida.

Kedratou iTukutuku

Nikolay Martynov

Sucu: 1958 (Bandarka, Yasayasa o Irkutsk)

Me baleti koya: E dau draivataka na nodra motoka na vakaitutu (chauffeur)

Rau vakamau kei Irina ena 1982. E rua na luvedrau

Ena 1997 e vulica o Irina na iVolatabu kei ira na iVakadinadina i Jiova. Na kena vakayacori na parofisai vakaivolatabu e vakadeitaka kina o Nikolay ni dina na ka e vulica tiko. Rau papitaiso vakaveiwatini ena 1998

Ka e Tukuna na Watina o Irina a

Na cava e vukei watimu me donu tiko ga nona rai ni vesu tu me sivia ni rua na yabaki?

E dei tu ga o koya ena nona ituvatuva ni wili iVolatabu kei na vakasama vakatitobu. E dau kaya tale ga na sala e sauma kina o Jiova na nona masu. Ia e dredre sara ga ni keitou tu veiyawaki. E dua na ulunivuvale ivakaraitaki vinaka o watiqu. Eso na gauna e yalolailai ni sega rawa ni vakarautaka na ka keitou gadreva. Ia e dau vakacegui koya ni keitou tukuna vua ni o Jiova e vakayagataki ira na mataveitacini mera vukei keitou. E kaya ni vukei koya tale ga nona dau raitayaloyalotaki keitou vakavuvale ena vuravura vou. Sa vakasamataka rawa tu o koya na itaratara ni neitou vale ena gauna se bera mai kei na kauvuata ena tea.

Yaroslav Kalin

Sucu: 1969 (Pivovarikha, Yasayasa o Irkutsk)

Me baleti koya: E susu ena vuvale iVakadinadina i Jiova. Ena 1951, e kau vakavesu na nona itubutubu, nona bubu kei nona tutu e Siberia

E dau vakavinakataka na tivi kei na retio

Papitaiso me iVakadinadina i Jiova ena 1987

Rau vakamau kei Tatyana ena 1991. E rua na luvedrau tagane, e rua tale ga na yalewa. Ena 2007 e takali na luvedrau gone duadua

Ka e Tukuna na Watina o Tatyana b

Na ituvaki dredre cava e sotava o watimu ni vesu tu vakawawa? Na cava tale ga e vukei koya me vosota?

E sivia ni rua na yabaki nona vesu tu ena dua na sela, sa bau dredre sara ga vua baleta e dau taleitaka na veimaliwai. E nuiqawaqawa vakalevu qai yalolailai ni tu taudua. Ia e sega ni via soro, se vakalomalomani koya. E dau vola mai vei keitou na ka e tukuni ena Kolosa 1:11: “Me vakaukauataki kemuni mada ga na nona kaukaua levu moni vosota kina na ka kece ena vosovoso kei na marau.” Qori e vukei koya me yalodina qai nuitaki Jiova tiko ga. E nuidei tu o Yaroslav ni na vakalougatataki ke cakava tiko ga na inaki i Jiova ena gauna qo me tawamudu.

Mikhail Moysh

Sucu: 1987 (Ukraine)

Me baleti koya: E cakacaka vakamatai, e dauveivoli tale ga

Rau vakamau kei Yelena ena 2009. E rua na luvedrau tagane

E papitaiso o Yelena ena 2010, sa qai dau tomani koya ena soqoni o Mikhail. Papitaiso sara o Mikhail ena 2016

Ka e Tukuna na Watina o Yelena c

Sa sivia e rua na yabaki nona vesu tu o Mikhail, ia na sala cava e vukei kemudou kina vakayalo na veitinani?

Na neirau ulumatua e yabaki 12. O koya e gone sa voleka ni yabaki tolu, ia ni se qai vula ono sa kau o Mikhail me lai vesu. E sega ni kila o koya na vuna e sega ni tiko kina i vale o tamana. Rau dau nanumi tamadrau vakalevu na gone. Ia e dau volavola mai vei rau o Mikhail me vaka na serekali, na veika me baleta na manumanu kei na manumanuvuka, eso na qito, e dau vola tale ga eso na vakekeli me rau cakava. Eso na gauna niu yalolailai, e dau vakayaloqaqataki au o watiqu. Dua na gauna au lomatarotarotaka: ‘Cava e yaco kina qo vei keitou vakavuvale?’ E volavola mai o Mikhail qai kaya ni noqu taro e sega ni vakaraitaka niu malumu vakayalo. E kaya: “Koya ga e bibi na ka daru na cakava ni basika na rai va qori. Me vakataki Jope, ke daru vakalaivi Jiova me vakadodonutaka nodaru rai, ena vaqaqacotaka o koya na nodaru vakabauta qai vukei kedaru me donu tiko ga nodaru rai.” Qori e vakayaloqaqataki au sara ga.

Igor Popov

Sucu: 1987 (Kazakhstan)

Me baleti koya: Ratou le walu na veitacini. Ni yabaki 11 o Igor, sa takali o tamadratou

E dau ukutaka na lomanivale, e palama tale ga

Ni takali oti o nodratou Ta, rau vulica sara na iVolatabu o nodratou Na kei na dua na tuakai Igor. Oti e tomani rau o Igor, qai marautaka nona vulica na veika me baleta na veivakaturi. Ena 2006 e papitaiso o Igor kei na vitu tale nona lewenivuvale

Rau vakamau kei Mangira ena 2013

Ka e Tukuna na Watina o Mangira d

Na tikinivolatabu cava e vukei kemudrau vakaveiwatini mo drau vosota na ituvaki dredre qo?

E dede nona vesu tu o Igor. Dua na gauna ni volavola mai, e kaya na ka e cavuti ena Same 118:5: “Au kaci vei Ja niu rarawa, e rogoca o Ja qai kauti au ina vanua ni veitaqomaki.” E tomana o Igor: “E rawa ni vakadewataki na vanua ni veitaqomaki, me ‘dua na rumu.’ Nida yalolailai ena rawa ni sauma o Jiova na noda masu, e vaka ga e sereki keda qai solia vei keda na vakacegu ni vakasama.” Keirau vulica ena ituvaki qo ni o Jiova ena tokoni keirau, ena sega tale ga ni biuti keirau se mani vanua cava keirau tu kina.

Denis Sarazhakov

Sucu: 1988 (Sayanogorsk, Republic of Khakassia)

Me baleti koya: E cakacaka ena tabana ni itukutuku ni veivoli

E susu ena vuvale iVakadinadina i Jiova. Rau vukei koya na nona itubutubu me lomani Jiova qai volekati koya. E vakadeitaka ni yaga tu ga na kena muri na ivakavuvuli vakaivolatabu. Papitaiso ena 2004

Rau vakamau kei Olesiya ena 2007

Ka e Tukuna na Watina o Olesiya e

E vakayaloqaqataki iko vakacava o Denis?

Keirau dau veitaratara ena vola ivola. E vakadonui me keirau veitalanoa ena talevoni vakadua e veimacawa, me rauta ni lima ga na miniti. E vakatarai tale ga meu sikovi koya vakarua e veivula, me dua ga na aua. Niu sikovi koya keirau na veitalanoa ena talevoni qai lati keirau na iloilo. Gauna qori e dau vakayaloqaqataki au ena iVolatabu o Denis, e kaya tale ga meu kua ni yalolailai. E tiko na vuna vinaka meda marautaka na ka eda sa cakava rawa. E sega ni vakaleqai keirau na ituvaki qo, ia e vakaukauataki ga.

Aleksey Solnechniy

Sucu: 1976 (Abakan, Krasnoyarsk Territory)

Me baleti koya: E daunilivaliva

Ni se lewena tu na mataivalu o Aleksey, rau sa vulica na iVolatabu kei ira na iVakadinadina i Jiova o tinana kei na dua na taci Aleksey. Ni lesu i vale, e taleitaka me vulica na iVolatabu. Papitaiso ena 2004

Rau vakamau kei Alyona ena 2011

Ka e Tukuna na Watina o Alyona f

Na cava e vukei watimu me donu tiko ga nona rai?

Nona dau masu wasoma o Aleksey e vakadeitaka ni marautaki koya o Jiova. E saga me donu tiko ga nona rai baleti ira na ovisa kei ira na vakailesilesi ni mataveilewai nira cakava tiko ga na nodra itavi. Qori e vukei koya me dei ni tutaka na yaca i Jiova, qai sega ni nanumi koya ga se na ituvaki e sotava. E dau nanumi au, ratou na wekana kei ira nona itokani, ia e saga me donu tiko ga nona rai qai mamarau.

Dina ni ratou tu veiyawaki na tacida qo kei na nodratou vuvale, ia eda nuidei ni na sega ni dua na ka ena tawasea na loloma ni Kalou vei ratou ena vuku ni nodratou vosota.—⁠Roma 8:35-39.

Veitaravi ni Gauna

Okotova 4, 2021

Caka na vaqaqara ena nodra vale na tacida ena yasayasa o Irkutsk. Ratou mani vaqaqai qai vesu o Nikolay, Sergey Kosteyev, Yaroslav, Mikhail, Aleksey, Andrey, kei Sergey Vasiliyev
Okotova 5, 2021

Vesu tu vakawawa o Yaroslav, Mikhail, kei Aleksey
Okotova 6, 2021

Vesu tu vakawawa o Sergey Kosteyev, Nikolay, kei Andrey. E vakatatabutaki i vale o Sergey Vasiliyev
Noveba 30, 2021

Caka na vaqaqara ena so tale na vale. Vesu o Denis kei Igor qai kau i Irkutsk, e sivia ni 1500 na kilomita na kena yawa
Tiseba 1, 2021

Vesu tu vakawawa o Igor
Tiseba 2, 2021

Vesu tu vakawawa o Denis
Tiseba 29, 2022

Ratou tekivu veilewaitaki

a b c d e f E sega ni rawa ni ratou vakatarogi o Brother Martynov, Brother Kalin, Brother Moysh, Brother Popov, Brother Sarazhakov, kei Brother Solnechniy ni ratou sa vesu tu me ratou wawa veilewai.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU