MAJI 29, 2024 | IROGO VOU: JULAI 10, 2024
RUSIA

IROGO VOU—BEITAKI NI CALA | “Au Sega ni Rere se Lomaleqa”

SARAVA/ROGOCA

Ena ika10 ni Julai 2024, e kaya na mataveilewai na Khabarovsk District Court of the Khabarovsk Territory mai Rusia, ni cala o Brother Valeriy Rabota. Ena vakatatabutaki tale ga me ono na yabaki. Ena sega ni biu e valeniveivesu ena gauna qo.

Kena iTukutuku

Valeriy Rabota

Sucu: 1961 (Ukraine)

Me baleti koya: E dau draivataka na lori ni vakau iyaya

E masu vua na Kalou ni via kilai koya. Ena siga tarava ga, era gole yani na iVakadinadina i Jiova mani saumi na nona taro. Papitaiso ena 1995

Rau vakamau kei Elvira ena 2018

Ka e Tukuna

Na cava e vukei iko mo yalodei nira gole yani na ovisa i nomu vale?

Oti sara ga neirau vakasigalevu kei watiqu keirau rogoca ni dua na ka e vadugu e katuba. Na kena rorogo e vaka ga ni viritaki mai e dua na vatu levu. Gauna vata ya au sa kila sara ga na ka e yaco tiko. Au lai vakasamataka sara e dua na itaba e vakaraitaki kina e dua na agilosi kaukaua, e raici ratou sobu tu e dua na vuvale ratou masu tiko nira vakarau curuma na sotia na nodratou vale. Au kaya sara vei watiqu: “Era raici kedaru tiko mai o Jiova, Jisu, kei ira na agilosi.” Oti au masu ga vakalekaleka, au lai dolava sara na katuba. Au sega ni vakamacalataka rawa na vakacegu au vakila, kei na noqu volekati Jiova ena gauna qori me yacova mai qo. Au sega ni rere se lomaleqa, au vakavinavinakataki Jiova gona ni solia vei au na lomavakacegu.

Eda qoroya na nona ivakaraitaki ni vakabauta o Valeriy, eda kila tale ga ni o Jiova ena taqomaki koya kei ira kece era yalodina vua.—Same 37:28.

Veitaravi ni Gauna

Maji 1, 2022

Tekivu vaqaqai
Maji 3, 2022

Caka na vaqaqara e nona vale, vakatarogi qai vesu tu vakawawa
Maji 5, 2022

Kau me lai vesu e valeniveivesu
June 29, 2022

Sere mai qai vakatatabutaki e vale
Okotova 7, 2022

Laveti nona vakatatabutaki e vale, qai vakatabui me gole ena dua tale na vanua
Me 11, 2023

Tekivu veilewaitaki

Raica Tale Ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU