ME 30, 2023 | IROGO VOU: Maji 6, 2024
RUSIA

IROGO VOU—TOTOGITAKI VAKAILAVO | Ratou Nuitaki Jiova na Tacida

SARAVA/ROGOCA

Ena ika29 ni Feperueri 2024, e kaya na mataveilewai na Teykovskiy District Court of the Ivanovo Region mai Rusia, ni cala o Brother Sergey Galyamin, Brother Anatoliy Lyamo, Brother Vladimir Spivak, kei Brother Aleksandr Vasichkin. Ratou na totogitaki vakailavo. O Vladimir e totogitaki me sauma e rauta ni $6,564 na ilavo ni Merika, o Sergey e sauma e $7,111 na ilavo ni Merika. O Aleksandr kei Anatoliy rau totogitaki me rau sauma e $12,034 na ilavo ni Merika.

Kedratou iTukutuku

Sergey Galyamin

Sucu: 1967 (Teykovo, Yasayasa o Ivanovo)

Me baleti koya: Dua tiko nona bisinisi ni vakavinakataki ivava

Rau vakamau kei Lyudmila ena 1991. E tolu na luvedrau yalewa

E qoroya na nona kila na yaca ni Kalou. E tiko ena nodra soqoni na iVakadinadina i Jiova, qai vakadeitaka ni sa kunea na ka dina ni raica na nodra yalololoma. Papitaiso o Sergey ena 2001, qai papitaiso o Lyudmila ena 2002

Ka e Tukuna

Cava o vulica ni o sotava na ituvaki dredre qo?

Niu raica na nodra vakalolomataki na tacida, dua na ka noqu cudru. Au lomaleqataka tale ga na ka ena yacovi au. Ia au qai vakasamataka na ka e tukuni ena Same 73:26: “E rawa ni malumalumu mai na yagoqu kei na lomaqu, ia na Kalou e uluvatu ni lomaqu.” E vukei au sara ga na tikinivolatabu qori. Au liaca ni sega ni dodonu meu lomaleqataka na veika e se bera ni yaco. E ka vakayalomatua meu na vaqaqacotaka noqu veiwekani kei Jiova qai nuitaki koya vakalevu.

Anatoliy Lyamo

Sucu: 1963 (Pogar, Yasayasa o Bryansk)

Me baleti koya: E cakacaka ena sala ni sitima

Rau vakamau kei Galina ena 1993. Rua na luvedrau, rua tale ga na makubudrau

E saga me kila na ka dina, qai taleitaka na matata ni veika e volai ena iVolatabu. Papitaiso o Anatoliy ena 1995, qai papitaiso o Galina ena 1997

Ka e Tukuna

Era tokoni iko vakacava na mataveitacini?

Au sa qai mareqeti ira ga vakalevu na tacida ena gauna qo. Au sega ni vakamacalataka rawa na sala e vakayagataki ira kina na tacida o Jiova mera vukei au. Levu na ituvaki dredre au sotava ni vaqaqai tiko noqu kisi. Ia e vukei keitou vakavuvale o Jiova ni vakayagataki ira na tacida. Era gole yani ena mataveilewai mera tokoni au. Qori e dusia na levu ni nodra yaloqaqa. Era vakauitukutuku mai vei au ena veisiga, ra qai masulaki keitou vakavuvale. E uqeti au qori meu vukei ira na sotava tale tiko ga na veitusaqati.

Aleksandr Vasichkin

Sucu: 1969 (Bryansk, Yasayasa o Bryansk)

Me baleti koya: Lewena tu na mataivalu ni bera ni mai iVakadinadina i Jiova. Wale tiko ga qo e dau qarava na lomanibai

Rau vakamau kei Nataliya ena 1993. Rua na luvedrau

Ni tiko ena soqoni, e qoroya na nodra dau yalovinaka na iVakadinadina i Jiova. Rau vulica vakaveiwatini na iVolatabu. Papitaiso o Nataliya ena 1994, qai papitaiso o Aleksandr ena 1995

Ka e Tukuna

E donu tiko ga vakacava nomu rai ena gauna dredre qo?

Au raica niu na yalolailai vakalevu keu dau lomalomani au. Au sega ni dau via vaqaqa na vuna au sotava kina na ituvaki qo, ia au kila qo e dua na itavi dokai meu vakadinadinataki Jiova. Au kila ni lekaleka ga na veika dredre qo, sa na vakarau oti tale ga. Keu yalodina tiko ga, ena rawa ni tawamudu na noqu veitokani voleka kei ira na mataveitacini, vakabibi o Jiova.

Eda vakadeitaka se mani vakacava na ituvaki dredre e vakilai ena vuravura qo, ena lekaleka ga ni vakatauvatani kei na nona vakalougatataki ira me tawamudu na yalodina vua o Jiova.—⁠2 Korinica 4:17, 18.

Veitaravi ni Gauna

Epereli 10, 2020

Tekivu na veivaqaqai
Epereli 11, 2020

Caka na vaqaqara e vale
Epereli 16, 2020

Vakatabui me ratou gole ina dua tale na vanua
Feperueri 2, 2023

Tekivu na veilewai

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU