OKOSITA 26, 2021 | IROGO VOU: JANUERI 12, 2024
RUSIA

IROGO VOU—VEISAUTAKI NA LEWA | Rawa ni Vesu e Dua na Tacida Tagane me 15 na Yabaki

SARAVA/ROGOCA

Ena ika11 ni Janueri 2024, e veisautaka na mataveilewai na Regional Court of the Khanty-Mansi Autonomous Area—Yugra mai Rusia, na lewa me baleti Brother Andrey Sazonov. Ena rogoci tale nona kisi ena mataveilewai na Uray City Court of the Khanty-Mansi Autonomous Area—Yugra.

Veitaravi ni Gauna

Ena ika24 ni Tiseba 2021, e kaya na mataveilewai na Uray City Court of the Khanty-Mansi Autonomous Area—Yugra ni cala o Brother Andrey Sazonov, qai totogitaki me sauma e $6,785 na ilavo ni Merika. A vesu tu me 15 na yabaki e valeniveivesu. Eda rarawataka na nona beitaki o Andrey ni cala, ia eda marau ni na sega ni biu e valeniveivesu
June 22 2020

Tekivu veilewaitaki
Okosita 22 2019

Laveti nona vakatatabutaki e vale, ia e vakatabui me cakava e eso na ka, me kua tale ga ni gole ena dua tale na vanua
Feperueri 26 2019

Vakatatabutaki tale e vale
Feperueri 6 2019

Oti na vaqaqara ena nona vale ni cakacaka kei na nona motoka, e vesu vakawawa me rua na siga
Janueri 31 2019

E beitaki ni daubasulawa ni “tuvanaka qai vakaitavi tiko ena isoqosoqo, e vakavuna na tikoyavavala”

Kena iTukutuku

Andrey Sazonov

Sucu: 1980 (Moscow)

Me baleti koya: E manidia ena dua na kabani. E qasenivuli na watina o Viktoria, rau qai vakamau ena 2002. E dua na luvedrau yalewa o Irina (Ira), dua tale ga na luvedrau tagane o Vyacheslav (Slava)

Tekivu vulica na iVolatabu kei ira na iVakadinadina i Jiova ena itekitekivu ni 1990, qai papitaiso ena 1997

Ka e Tukuna

Na ka dredre cava duadua o sotava?

Noqu yawaki ratou na noqu vuvale, au sega tale ga ni rawa ni cakava e dua na ka meu vukei ratou kina. Niu vakasamataka na veika dredre ratou rawa ni sotava, au dau lomaleqataki ratou sara ga. Au lomaleqataki ira tale ga na mataveitacini a caka tale ga na vaqaqara ina nodra vale.

Cava e vukei iko me donu tiko ga nomu rai ena gauna o vesu tu kina?

Au sa qai kila niu sega ni lewa rawa na kequ ituvaki e valeniveivesu. Au sega tale ga ni kila na ka ena yacovi au. Dau dola ga mai na katuba ni rumu au vesu tu kina, au qai kau ina dua tale na vanua. E vinakati gona me donu noqu rai ena veika au na sotava. Au dau vakasamataka na Roma 12:21 e kaya: “Me kua ni rawai iko na ca, mo rawa tiko ga na ca ena vinaka.” Au vakadinadinataka sara ga na yaga ni vakavuvuli vakaivolatabu qori ena noqu bula. Au dau saga gona meu sauma tiko ga ena vinaka na ca e caka vei au, meu vosa vakayalovinaka qai veidokai vei ira kece e valeniveivesu, vei ira mada ga na vakavuna na noqu vesu. Au dau saga tale ga meu kua ni cudruvi ira. Niu saga me vinaka na ka au cakava vei ira na kequ meca, au raica sara ga ni veisau na nodra itovo. Qori e dua na ka au marautaka vakalevu!

Ni bera niu vesu qai veilewaitaki, au dau vulica qai vakananuma e rua na sere ni broadcasting, na “Kua ni Soro” kei na “Meu Yaloqaqa.” E yaga dina vei au na rua na sere qori. Au na lagata wasoma ena gauna au vesu tu kina. E dau vakayaloqaqataki au qai solia vei au na kaukaua meu vosota tiko ga.

Cava o na tukuna vei ira eso tale me rawa nira vakarautaki ira ena veitusaqati era rawa ni sotava?

Vaqaqacotaka nomu veiwekani kei Jiova, qai vakaogai iko vakalevu ena cakacaka e lesia vei keda ena gauna qo . . . Qori ena vakamarautaki Jiova, o na sega ni vakawelei tale ga ena so na ka ena rawa vakamalumalumutaka nomu vakabauta.

Eda vakavinavinakataka na nodra ivakaraitaki vinaka na tacida e Rusia era sotava tiko na veivakacacani. Eda nuidei ni na vukei ira o Jiova mera “yaloqaqa qai kaukaua.”—Same 138:3.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU