ME 2, 2023 | IROGO VOU: JULAI 3, 2023
RUSIA

IROGO VOU—BEITAKI NI CALA E DUA NA TACIDA | Uqeti Koya na iVakaraitaki ni Vakabauta

SARAVA/ROGOCA

Ena ika30 ni June 2023, e kaya na mataveilewai na Leninskiy District Court of Novosibirsk mai Rusia, ni cala o Brother Dmitriy Dolzhikov ena vesu me tolu na yabaki. Ia e veisautaka na turaganilewa na kena itotogi ya me vakacakacakataki vakaukaua me tolu na yabaki. Ena sega ni biu e valeniveivesu ena gauna qo. Ena taura na matanitu e rauta ni 10 na pasede ni nona veisaumi. E vakatabui tale ga me biuta na siti.

Kena iTukutuku

Dmitriy Dolzhikov

Sucu: 1978 (Kamyshevka, Yasayasa o Rostov)

Me baleti koya: Cakacaka ena tabana ni volivoli kei na taravale

Kilai ira na iVakadinadina i Jiova ni tekivu vulica o tinana na iVolatabu. Tiko ena dua na noda soqo qai qoroya na nodra veilomani qai duavata na mataveitacini. Papitaiso ena 1997

Rau vakamau kei Marina ena 2008

Ka e Tukuna

O vakarautaki iko vakacava ena veivakacacani?

Niu raica nona vesu o Dennis Christensen ena 2017, au vakasamataka na sala au rawa ni vaqaqacotaka kina noqu vakabauta ni bera niu vesu. Au vakatotomuria na masu e cavuti ena Same 26:2. E kerei Jiova o Tevita me dikeva qai vakasavasavataka na nona vakanananu kei na lomana. Au kerei Jiova gona me vukei au meu kila na noqu malumalumu. Au wilika tale ga na ivola na Proclaimers kei na Jisu—Na Sala, Na Dina, Na Bula. Au saga tale ga meu nanuma vinaka na tikinivolatabu e yalataka kina o Jiova ni na vukei ira nona tamata nira vakacacani.

Na italanoa cava ena iVolatabu e vukei iko mo vosota?

E vakayaloqaqataki au na ivakaraitaki i Ilaija. E kerea na veivuke i Jiova ni drovaka tiko na Ranadi ca o Jesepeli. E sega ga ni vakaraitaka vei koya o Jiova na nona kaukaua, ia e vakayaloqaqataki koya qai vakadeitaka ni sega ni tiko taudua. E oti na noqu lomaleqa, niu kila ni na tokoni au o Jiova qai tu vakarau me vukei au.

Eda nuidei ni o Jiova ena dau vakayaloqaqataki keda kece, wili kina o Dmitriy, ni kila vinaka na noda vakabauta kei na noda vosota.—Vakatakila 2:19.

Veitaravi ni Gauna

Me 13, 2022

Tekivu na veivaqaqai
Seviteba 8, 2022

Caka na vaqaqara e vale qai vesu tu vakawawa
Seviteba 9, 2022

Vakatarogi qai vakavodoki ina waqavuka mai Chelyabinsk ina valeniveivesu i Novosibirsk. E sivia e 1,500 na kilomita na kena yawa.
Noveba 11, 2022

Tekivu na veilewai
Noveba 24, 2022

Sere mai valeniveivesu qai vakatatabutaki e vale

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU