EPERELI 25, 2023 | IROGO VOU: OKOTOVA 23, 2023
RUSIA

IROGO VOU—BEITAKI NI CALA O BROTHER VLADIMIR BAYKALOV | “Noqu Daumamarau e Vukei au Meu Dei Tiko Ga”

SARAVA/ROGOCA

Ena ika23 ni Okotova 2023, e kaya na mataveilewai na Zavodskiy District Court of Kemerovo mai Rusia, ni cala o Brother Vladimir Baykalov. E vakatatabutaki tale ga me ono na yabaki. Ena sega ni biu e valeniveivesu ena gauna qo.

Kena iTukutuku

Vladimir Baykalov

Sucu: 1963 (Krapivinskiy, Yasayasa o Kemerovo)

Me baleti koya: E dau veivacu saumi ni bera ni dua na iVakadinadina i Jiova. Oti e dauveivakavulici ena qito (athletic trainer), e manidia tale ga ena dua na raraniqito

Rau vakamau kei Irina ena 1984. E dua na luvedrau tagane, dua tale ga na yalewa

A vulica o Irina na iVolatabu ena 1995, qai papitaiso ena 1996. E raica o Vladimir na yaga ni kena muri na ivakavuvuli vakaivolatabu ena nona vuvale. Ni oti nona mavoa ena vuku ni qito, e vakasamataka na nona bula mani vulica na iVolatabu. E papitaiso ena 1999

Ka e Tukuna

Na itovo cava e vukei iko mo vosota?

Noqu daumamarau e vukei au meu dei qai toso tiko ga. Au solia noqu vinaka kece me rawa niu marautaka tiko noqu qaravi Jiova. Au dau vakasamataka vakatitobu tale ga na veika totoka e yalataka tu o Jiova. Qori e vukei au meu marau tiko ga ena gauna mada ga ni veilewai.

Na tikinivolatabu cava e vakacegui iko?

E vakamacalataka o Jisu ena Marika 13:11, na ka meda cakava nida kau e mataveilewai: “Dou kua ni lomaleqataka na ka mo dou tukuna, dou tukuna ga na ka e tukuni vei kemudou ena gauna ya, dou na sega ni vosa, ena vosa ga ena vukumudou na yalo tabu.” Na imatai ni gauna e rogoci kina noqu kisi, e solia vei au na turaganilewa na galala meu valataka na noqu dodonu. E sega ni rawarawa dina, ia ena veivuke ni yalotabu i Jiova au vosa rawa kina ena veidokai, qai lewai au vinaka tale ga. Au vakila ni sauma o Jiova na noqu masu ni rawa niu yaloqaqa qai dei.

Eda nuidei ni o Jiova ena vakaukauataki ira tiko ga na nona dauveiqaravi yalodina me rawa nira vosota ena marau.—Jemesa 1:2, 3.

Veitaravi ni Gauna

Feperueri 2, 2022

Tekivu vaqaqai
Feperueri 3, 2022

Caka na vaqaqara e nona vale
Okotova 26, 2022

Beitaki qai vakatabui me gole ina dua tale na vanua
Noveba 30, 2022

Tekivu veilewai

Raica Tale Ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU