OKOTOVA 1, 2021 | IROGO VOU: OKOSITA 29, 2023
RUSIA

IROGO VOU—BEITAKI NI RATOU CALA | Yalodina Tiko ga e Lima na Tacida

SARAVA/ROGOCA

Ena ika28 ni Okosita 2023, e kaya na mataveilewai na Promyshlenniy District Court of Orenburg mai Rusia, ni ratou cala o Brother Vladimir Kochnev, Brother Vladislav Kolbanov, Brother Pavel Lekontsev, Brother Sergey Logunov, kei Brother Nikolay Zhugin. Ratou na vakatatabutaki me rua veimama na yabaki ina tolu veimama na yabaki. Ratou na sega ni biu e valeniveivesu ena gauna qo.

Veitaravi ni Gauna

Maji 1, 2021

Oti e dua vakacaca na yabaki na kau ni nodratou kisi ina valenivolavola ni dauveibeitaki, sa qai tekivu rogoci nodratou kisi ena mataveilewai na Promyshlenniy District Court of Orenburg
Janueri 14, 2020

Sega ni matata na ka ratou beitaki kina mani kau lesu na nodratou kisi ina valenivolavola ni dauveibeitaki
Okosita 3, 2018

Sereki o Vladimir ni oti e 79 na siga nona vesu tu qai vakatatabutaki ga i nona vale
Me 16, 2018

Ra vaqaqara na vakailesilesi ena 19 na vale ena yasayasa o Orenburg. Rau mani kau o Vladimir kei Vladislav me rau lai vesu tu vakawawa. E sere o Vladislav ni oti e tolu na siga qai vakatatabutaki i nona vale
Me 14, 2018

Era tekivu vaqaqa na Investigative Directorate of the Investigative Committee of the Russian Federation for the Orenburg Region na nodratou kisi na tacida qo

Kedratou iTukutuku

Vladimir Kochnev

Sucu: 1979 (Orenburg)

Me baleti koya: Ni se gone, e taleitaka na siwa kei na qito soka. E dau caka kaukamea, e dau vakavinakataka tale ga na tivi kei na retio. Papitaiso me iVakadinadina i Jiova ena 1993. Vakamau kei Galina ena 2003

Ka e Tukuna

E vaqaqacotaka vakacava nomu veiwekani kei Jiova na ituvaki o sotava qo?

Meu kaya vakadodonu au volekati Jiova vakalevu ena gauna au vesu tu kina. Me vaka niu tu taudua qai sega ni lewa tale ga na ituvaki au sotava, au vulica kina meu dau nuitaki Jiova vakalevu.

Cava o na tukuna vei ira eso tale me rawa nira yalodina nira vakacacani?

Na veivakacacani ena sega ni rawa ni veisautaka e dua me vinaka se ca nona itovo. Ia ena vakavotuya ga mai na ivakarau dina ni lomana. Ke da dei gona ena noda ituvatuva vakayalo da qai kaukaua vakayalo, ena qaqaco vinaka na noda vakabauta. Meda kua ni waraka e dua na gauna veiganiti meda qai vaqaqacotaka noda veiwekani kei Jiova. Kena ivakaraitaki, kua ni waraka sara mo vakacacani qai tekivu wilika na iVolatabu se mo masu wasoma.

Pavel Lekontsev

Sucu: 1981 (Kytat, Yasayasa o Krasnoyarsk)

Me baleti koya: Ni se gone e dau taleitaka na veika bula. Taleitaka na taubale vakabalavu, siwa, kei na vaqara mushroom. Cakacaka ena tabana ni tarataravaki. Tekivu vulica na iVolatabu kei ira na iVakadinadina i Jiova ena veiyabaki ni 1990. E qai mai kila ni rawati ga na marau ni muri na ivakatagedegede vakaiVolatabu. Papitaiso ena 1999, rau vakamau kei Oksana ena 2017

Ka e Tukuna

Cava o cakava ni caka na vaqaqara i nomu vale, o vakatarogi qai veilewaitaki?

Nira curuma vakaukaua na noqu vale na ovisa, au masu vakalekaleka ga meu kerea na veivuke i Jiova. Au kurabuitaka nona sauma totolo o Jiova na noqu masu ena gauna lekaleka ya. Au kerei koya me vukei au meu kua ni rere, oti ga e vica na sekodi au sa vakila na lomavakacegu. Au nuidei qai sega ni taqaya.

Cava o vakadeitaka mo cakava ke mani tau na kemu itotogi?

Au sega ni kila na ka ratou na vakatulewataka na mataveilewai. Ia au nuidei tu ni o Jiova ena vakaukauataki au. Se mani cava e vakatulewataka na mataveilewai eda se qaqa tiko ga! Ena vakarautaka o Jiova na yalona tabu me tokoni keda meda vosota na veika dredre. Qori e dua na ka au dau vakadinadinataka ena noqu qaravi Jiova voli mai! Au vakadeitaka gona meu vakaotia na veitaucici.—2 Timoci 4:7.

Sergey Logunov

Sucu: 1962 (Orenburg)

Me baleti koya: Vulica me kenadau ena vakayagataki ni misini. Oti nona lewena tu na mataivalu e kenadau sara ena veitaba. E dau teitei ena gauna qo. E taleitaka na veitaba, e dau qiri qita tale ga. Tekivu vulica na iVolatabu kei ira na iVakadinadina i Jiova ena veiyabaki ni 1990. Papitaiso ena 1992, rau vakamau kei Larisa ena 1994

Ka e Tukuna

O na vukei ira vakacava eso tale mera vakavakarau ena veivakacacani era na sotava?

Ena vakatovolei noda yalodina ena gauna eda sotava kina na veika dredre. Ena vinakati gona me qaqaco vinaka tu noda veiwekani kei Jiova kei Jisu Karisito. E vaka ga na iseleiwau, o ira era cakava mai era na raica me kaukaua vinaka na kena kaukamea me kua kina ni kamusu ena gauna ni vala. Ke dua na sotia e tiko na nona iseleiwau kaukaua, ena nuidei ena gauna ni vala. E kaya o Jisu ni “o koya e dina ena ka lailai ena dina tale ga ena ka levu.” (Luke 16:10) Ke da talairawarawa gona vei Jiova ena ka kece ena gauna qo, ena rawa ni vukei keda qori meda yalodina tiko ga.

Nikolay Zhugin

Sucu: 1976 (Kazakhstan)

Me baleti koya: Ni se gone e dau taleitaka na qito. E dau tuki kaukamea. Tekivu vulica na iVolatabu kei ira na iVakadinadina i Jiova ena veiyabaki ni 1990, papitaiso sara ena 1996. Dina ni sega ni tiko ena dina na watina o Galina, ia ratou marautaka tiko nodratou bula vakavuvale kei na nodrau susugi na luvedrau

Ka e Tukuna

Cava o kerea vei Jiova ena gauna qo?

O Jiova ena sega ni taqomaki keda mai na noda leqa kece se na veivakacacani eda sotava. E vakalaiva mera sotava qori na nona dauveiqaravi. Ia au kerei koya wasoma me solia vei au na yalona tabu meu vosota na veika dredre au sotava. Au vakila sara ga ni vukei au o Jiova meu marau tiko ga ena gauna au vaqaqai kina qai veilewaitaki. Au vakadeitaka ni veitokoni ga i Jiova au rawa ni vosota kina na veika dredre qo!

Sa sivia qo e tolu na yabaki nodratou veilewaitaki tiko na tacida qo, ia ratou vakadeitaka me ratou yalodina tiko ga vei Jiova. E matata sara tu ga eke ni o Jiova e yalodina tiko vei ratou.—2 Samuela 22:26.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU