TISEBA 23, 2021 | IROGO VOU: OKOSITA 29, 2023
RUSIA

IROGO VOU—BEITAKI NI RAU CALA | Veivakacegui na ka e Vakarautaka o Jiova

SARAVA/ROGOCA

Ena ika23 ni Okosita 2023, e kaya na mataveilewai na Birobidzhanskiy District Court of the Jewish Autonomous Region mai Rusia, ni cala o Brother Oleg Postnikov kei Sister Agnessa Postnikova. O Oleg ena vakatatabutaki me lima veimama na yabaki, o Agnessa ena vakatatabutaki me va veimama na yabaki. Rau na sega ni biu e valeniveivesu ena gauna qo.

Ena ika11 ni Okotova 2022, e sega ni duavata na mataveilewai na Court of the Jewish Autonomous Region mai Rusia, ena ka rau beitaki kina o Brother Oleg Postnikov kei na watina o Sister Agnessa Postnikova. Erau na veilewai tale.

Ena ika25 ni Epereli 2022, e kaya na mataveilewai na Birobidzhan District Court of the Jewish Autonomous Region, ni rau cala o Oleg kei Agnessa. Ena vakatatabutaki o Oleg me lima veimama na yabaki, o Agnessa ena vakatatabutaki me lima na yabaki. Rau na sega ni biu e valeniveivesu ena gauna qo.

Veitaravi ni Gauna

Feperueri 12, 2021

Beitaki o Agnessa vei ratou na FSB ni daubasulawa. Ratou beitaki na Postnikov ni ratou tauyavutaka e dua na ilawalawa “daubasulawa,” e uqeta tale ga na “tikoyavavala.” Rau vakatabui o Oleg kei Agnessa me rau biuta na vanua rau tiko kina, me rau kua tale ga ni vakayagataka na nodrau ilavo ena baqe. Rau okati tale ga ena lisi ni yaca ni lewenivanua e Rusia era vakavuna na tikoyavavala
Feperueri 12, 2020

Tekivu vaqaqai o Oleg vei ratou na FSB

Kedrau iTukutuku

Oleg Postnikov

Sucu: 1965 (Vyazemsky, Yasayasa o Khabarovsk)

Me baleti koya: Cakacaka vakapalama (plumber). Ni se itabagone, e lewena e dua na ilawalawa dauveivorati. E vesu ni beitaki ni vakaitavi tiko ena basulawa. E vulica na iVolatabu e valeniveivesu. Ni sere mai, e papitaiso sara me iVakadinadina i Jiova ena 1986

Rau vakamau kei Agnessa ena1989, qai rua na luvedrau

Ka e Tukuna

O vulica vakacava na iVolatabu e valeniveivesu?

A vesu tale tiko ga ena gauna ya e dua na iVakadinadina i Jiova ni sega ni via curu ena mataivalu . . . Levu na gauna keirau na veitalanoataka na ivakadinadina ni bula tiko na Kalou, kei na veika e cala kina na bula vakaidewadewa. Keirau na veitalanoataka tale ga na veika vakatubuqoroqoro e tu e lomalagi kei vuravura. Qori e veisautaka sara ga na noqu rai. Au wilika tale ga eso na nodra ivola vakaivolatabu . . . Au tomana tiko noqu vuli, niu sere oti ga au papitaiso sara.

O vaqaqacotaka vakacava na nomu nuitaki Jiova?

Au dau masu vakalevu, vakabibi ke tukuni me keirau lai sota kei na dauveivaqaqai. Niu vakatarogi, au liaca keu nuitaka ga noqu kilaka kei na kaukaua ena rawarawa sara me lawakitaki au meu cakitaka noqu vakabauta. Au sa saga tu ga meu nuitaki Jiova vakatabakidua meu rawa ni lomavakacegu qai nuidei. Meu kua tale ga ni leqataka na veika e se bera ni yaco.

Na tikinivolatabu cava e dau vakayaloqaqataki iko?

Au dau vakasamataka vakalevu e dua na ka e cavuti ena Josua 1:9: “Ni tokoni iko o Jiova na nomu Kalou ena vanua kece o lakova.” Au na rairai kau ena vanua au sega ni vinakata. Ia e vaka ga e tukuna tiko vei au o Jiova ena tikinivolatabu qori: ‘Kua ni leqataka e dua na ka, au na tokoni iko. Me vaka ga noqu tu e yasadra noqu [dauveiqaravi yalodina vakai] Josefa, au na tiko tale ga kei iko ena vanua kece o lakova.’ Qori e vukei au meu kua ni leqataka na veika ena rawa ni yaco ena veigauna se bera mai. Meu kua tale ga ni vakasamataka eso na ka ena vakayalolailaitaki au.

Agnessa Postnikova

Sucu: 1963 (Kazakhstan)

Me baleti koya: Ratou le vitu na veitacini, e ikalima o koya. Ni se gone, e dau taleitaka na danisi kei na vakatasuasua. E taleitaka tale ga na vakasisisi ena waicevata. Gauna qo e taleitaka me gade ena veivanua ena taudaku ni tauni, tei senikau, kei na taubale ena veiulunivanua. E cakacaka ena sitoa ni culacula

Papitaiso ena 1979, rau vakamau kei Oleg ena 1989

Ka e Tukuna

Cava e vukei iko ni o sotava na ituvaki dredre?

Au vakavinavinakataka na iLawalawa Dauvakatulewa ni vakarautaka mai na kakana vakayalo ena kena gauna donu. Au vakavinavinakataki ira tale ga na tacida era veivuke ena kena vakarautaki mai na sere, drama, vidio, porokaramu ni soqo ni veiwasewase kei na vakadewataki ni iVolatabu. Au vakavinavinakataki Jiova niu lewena e dua na vuvale dau veilomani, era dau veivakayaloqaqataki ni sotavi na ituvaki dredre.

Cava e dua na isolisoli i Jiova e vukei iko vakalevu?

E vukei au vakalevu noqu dau masu vua. E yaga tale ga vei au na sere ni JW Broadcasting, me vaka na ‘Vuravura Vou’ kei na ‘Sa Voleka Sara.’ E laurai ena sere qori na veika ena yaco ena vuravura vou. Qori e vukei au meu lomavakacegu, au nuidei tale ga kina ni lomani au na Tamaqu vakalomalagi o Jiova.

Na veika rau sotava na tacida qo, eda vakadinadinataka kina ni o Jiova e dau vakarautaki ira na nona dauveiqaravi mera yalodina nira sotava na ituvaki dredre. Meda vakararavi tiko ga vei Jiova ni na vakaraitaka vei keda na ‘dei ni nona loloma, kei na yalodina.’—Same 115:1.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—⁠Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU