29 JANUERI, 2021
RUSIA
IROGO VOU | Beitaki ni Cala o Brother Roman Baranovskiy kei Tinana o Sister Valentina Baranovskaya
Ena ika4 ni Me 2022, e vakataulewataka na mataveilewai na Khakassia mai Rusia, me sere mai valeniveivesu o Sister Valentina Baranovskaya, e yabaki 71. E sega ni vakadonuya na mataveilewai nodratou kerekere na dauveibeitaki me sereki koso. E sivia e dua na yabaki nona vesu tu o Valentina. E se vesu tiko na luvena o Roman ena vuku ni nona vakabauta.
Ena ika4 ni Maji 2022, e kerea na tabana ni dauveibeitaki me veisautaki na lewa e tauca na mataveilewai na Ust-Abakan District Court mai Rusia, ya me sereki o Sister Valentina Baranovskaya. Ratou sega ni vakadonuya na dauveibeitaki me sere koso. Ratou kaya “ni se bera ni veivutunitaka o Valentina nona cala.” Ena tiko ga e valeniveivesu me yacova ni vakadonuya na mataveilewai na nodratou kerekere na dauveibeitaki.
Ena ika24 Me 2021, e sega ni rogoca na mataveilewai na Supreme Court of the Republic of Khakassia mai Rusia, na nodrau kerekere o Brother Roman Baranovskiy, kei tinana e yabaki 70 o Valentina. Rau na tiko ga e valeniveivesu. E kaya tale ga na mataveilewai ni rau na vakatatabutaki tale ena so na ka ena gauna rau na sere kina mai valeniveivesu.
Ena ika24 ni Feperueri 2021, e vakataulewataka mataveilewai na Abakan City Court of the Republic of Khakassia mai Rusia, me vesu me ono na yabaki o Roman. E totogitaki tale ga o Valentina, me rua na yabaki e valeniveivesu. Qo se qai matai ni gauna me vesu kina e dua na tacida yalewa e Rusia ena vuku ni nona vakabauta. E yabaki 70 o Valentina ena Epereli 2021, e tauvi strouk ena Julai 2020. Rau vesu ena gauna ga e tau oti kina na lewa.
Kedrau iTukutuku
Roman Baranovskiy
Sucu: 1974 (Balakovo, e Saratov)
Me baleti koya: Dauvukei tinana ena vakavinakataki ni vale. Taleitaka na qiri qita, qito chess, kei na soka
Ni se itabagone e dau via kila na inaki ni bula. E kaya: “Eso na gauna au dau kerea na Kalou me vakaraitaka vei au na ibalebale dina ni bula.” Ena yabaki 1993, e vulica na iVolatabu kei ira na iVakadinadina i Jiova. E papitaiso sara ena 1997
Valentina Baranovskaya
Sucu: 1951 (Vannovka, e Kazakhstan)
Me baleti koya: Cakacaka vakadaunifika, kei na ka vakailavo. Ena 2006, e cegu mai na nona cakacaka. Taleitaka na vasaqa, vola sere, kei na italanoa buli
Ena 1995, e vulica kei luvena tagane na iVolatabu kei ira na iVakadinadina i Jiova. Uqeti koya vakalevu ni kila ni sega ni lasu rawa na Kalou. E papitaiso ena 1996
iTukutuku ni Veilewai
Ena ika10 ni Epereli 2019, era curuma vakaukaua na ovisa e va nodratou vale na tacida e Abakan. E okati tale ga kina nodrau vale o Brother Roman Baranovskiy, kei tinana o Valentina. Era taura na ovisa na nodrau iVolatabu, iyaya vakalivaliva, kei na so nodrau ivola. Rau beitaki tale ga ni rau basulawa.
E kaya o Roman: “Gauna ra vaqaqara mai kina, keirau a soqoni tiko qai veivosakitaki tiko na 1 Korinica 10:13. Keirau vulica ena tikinivolatabu qori ni o Jiova e sega ni digia na veivakatovolei eda na sotava. E sega ni va qo nona rai: ‘Iko na tamata kaukaua, o na rawa ni vosota na ka dredre qo.’ Ke va qori nona nanuma, eda na nuitaka ga noda kaukaua meda vosota. E duidui na veivakatovolei eda na sotava. Ia eda na vosota rawa ga ni da nuitaka nona veivuke o Jiova.”
Ena Julai 2020, e tauvi strouk o Valentina, e kaya: “Sa qai bibi ga na kequ mate, ia e vukei au tu ga o Jiova. Noqu dau masu wasoma vua e vaka ga e taura tu na ligaqu. Dua na ka na levu ni marau kei na vakacegu au vakila.”
E kaya o Valentina ena ka kece e sotava qori: “Au na qaravi Jiova me tawamudu. Se mani vacava na dredre au sotava, au na yalodina tu ga vua.”
E kaya o Roman ni vaqaqacotaka na nona vakabauta nona dau vakasamataki ira vakatitobu na talanoataki tu ena iVolatabu, vaka kina o ira ena gauna qo. Ni dau vakasamataka na nodra vakaraitaki e dau taroga: ‘Na veivakatovolei cava era sotava, kei na vuna? Cava e vukei ira mera vosota ra qai dei tiko ga ena vakabauta? E vukei ira vakacava o Jiova ni vakayagataka na yalona tabu?’ Na nona isaunitaro e vakadeitaka se mani veivakatovolei cava e sotava ena rawa tale ga ni vosota. Ni o “Jiova ena solia na kaukaua meda vosota rawa kina na veivakatovolei.”
Meda masulaki Roman, Valentina, kei ira na tacida e Rusia mera nuitaki Jiova tiko ga me nodra ivakaruru, kei na kaukaua.—Same 46:1.
Rawa ni o Wilika Tale ga
ITUKUTUKU VOU
Vesu ena Vuku ni Nodra Vakabauta—Rusia
Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.